Vina Sinensia

Quoddam vinum bituricum sinense, quingentis sexaginta Burdigalae natis praelatum, praemio Ampullae Optimae affectum est. Quod nonnulli aestimant tantum rerum discrimen quantum erat anno 1976 illud Paridis iudicium, ut aiunt, quo vites Californienses Antiquiorum Terrarum antepositi sunt, originibus gustantes celatis. Abeant tamen de vino sinensi ioci faciliores, ut lagoenam alteram cupitum iri viginti minutis post primam consummatam. Haec enim res omnibus proderit, non solum ad superinstitoria properantibus superiora vindemias sinenses quasi lynceis indagatum, sed eis etiam qui ne guttam quidem Jia Bei Lan umquam sumpturi. Nam Sinenses, numero et pecuniâ crescentes, Americanos et Iaponicos iamiam superavere, plus nempe burdigalensis atri importando quam quaelibet alia extra Unionem Europeam civitas. Unde Petrus et Margaus nunc maximi veneuntur, quare et botri minores, proh dolor, maioris coquuntur. Sed Sinenses si quae sapiunt ipsi confecerint vina, adhuc fieri potest ut nos Francogallica reperiamus antequam decoquamus.

Scripsit fr. Thomas Crean