Annus
2 0 1 7


SERES INDIQUE CONTROVERSIAM DE CONFINIO ORTAM DIRIMUNT

Colloquia continuantur ut utraque pars milites recipiat

himalaya.jpg

Cum nonnullas septimanas de regione Doklam in monte Himalaya sita proeliatum esset, Seres Indique controversiam nunc diremisse dicuntur. Sushma Swaraj, ministra Indica rerum exterarum, nuperrime nuntiavit convenisse, ut utraque pars copias suas quam celerrime reciperet. Seres dixerunt rem gratam esse, quod copiae Indorum se reciperent; tamen fore, ut milites sui in sua confinii parte vigilias circumirent.

Seres iam antea Indos monuerant, ut copias reciperent, dicentes se terram suam utique defensuros. Sed in tantis controversiis tamen contigit, ut colloquia per legatos utriusque partis habita continuarentur.

Discordiae ortae sunt, cum in regione a Seribus vindicata milites Serici viam munirent. Seres Indis crimini dederunt, quod prohibere vellent, ne via muniretur.

De alia regione in monte Himalaya sita Seres cum Indis anno MCMLXII acerrime pugnaverant.

Scripsit Volfgangus Austriacus



Retro ad:

Novissima editio
Summum paginae