De Adamante et socolata

In media provincia meridionali Oxoniensi (South Oxfordshire) eminet magnum aedificium cantho simile, ubi machina immanis continetur unde fragmenta materiei illustrabuntur: quae machina "Fons adamantinae lucis" (Diamond Light Source) appellata, cuius pretium circiter CCC miliones Anglicarum librarum (CCCCL miliones euronum) fuit, plerumque a moderatoribus Regni Coniuncti persolutum, post menses sex parata erit. In medio aedificio stat synchrotron, id est machina particularum acceleratrix ad radium tam validum creandum apta, quo studiosi materiem usque ad moleculas atomosque inspiciant.

Nam, si electronum radio motum, cuius velocitas fere eadem atque lucis est, vi magnetica imponas, iter inflectitur et lux synchrotronica (synchronoelectronica), id est electronum simul pervectorum, generatur. Electrones, vehementer ex vacuo tubo proiecti, iterum atque iterum per magnum anulum circumvehuntur, dein per alterum maiorem anulum, unde eorum vis paulatim deminuitur: inde radii ad materiem penetrandam oriuntur, quorum undae longitudo a microundis usque ad radios X extenditur. Lux Adamantina longe vehementius fulget quam radii X, quibus medici in nosocomiis uti soliti sunt. Primum mense Iulio radium fulgidum Adamas emisit, quem in imagine adposita aspicis, post menses vero sex sine ulla intermissione nisi reficiendi causa radios proiciet.

Sperant periti scientiae physicae se ita atomorum ordinem in metallis magneticis, habitum materiei singulariter compressae aut torrefactae, moleculas proteinarum et viri (*) alicuius perspecturos esse, vel quomodo in socolata conficienda moleculae migrent.

(*) virus, -i

Scripsit Herimannus Novocomensis