Feriae XXV^ae latinae
Ferigoletenses

Abbaye St-Michel de Frigolet o praem
F-13150 Tarascon sur Rhône

feriae@frigolet.com
tel. (33)04 90 95 70 07

http://217.133.138.249/classico/eventi/7.txt

VIDEAS
http://www.academialatina.org

8 d. m. Aprilis Commoratio Seattlensis habebitur proxima!

Commorationi Seattlensi 18 die mensis Februarii peractae undecim iterum interfuere participes, etsi non omnes eidem erant qui mense Ianuario adfuerant. Scilicet, ob scholarum superiorum vacationem itinerabant eo tempore nonnulli. Convenimus undecima hora in Thermopolium Sinus Elliott, quod situm est in Bibliopolii Sinus Elliott hypogeo. Hoc thermopolium -- ubi, praeter caffeam expressam exquisitam, apponitur sapidum opus pistorium glutine triticeo vacans -- nobis sat bene notum erat, nam ibi iam aliquoties congregati eramus. Ipsum amplum bibliopolium, in pediplanis situm, gratissime inspexerunt nonnulli e nostro numero. Inter alia, memoriae lusum illum in thermopolio lusimus qui dicitur "Vasa mea colligo et impono..." Duodecima fere hora quandam in popinam portoriam transiimus ut Latine usque loquentes pranderemus.
Post prandium ambulationemque postprandialem Aquarium Seattlense invisimus. In Aquario plurima piscium et crustaceorum et molluscorum mammiferorumque aqualium exempla scrutati sumus. De quibus quo facilius colloqui possemus indices aliquot vocabulorum appositorum et Stephanus et Iunipera ceteris suppeditaverant. Societas aluminica Alcoa pro discipulis participibus aditiales tesseras emit. Quibus confectis rebus, perrexerunt multi in crami gelidi popinam Italicam nomine "Gelatiamo" ubi, bellariis fruentes, variis de rebus sermones iucundos satis diu serimus et quisque ea vocabla memoravit quae illo ipso die didicerat: velut "squalus," "pistrix," "lutra/lutris," "fratercula," "lacustris" et ita porro. Postremo Stephanus et Brennus quadam in collyrina (vulgo "trattoria") cenantes solitaque argumenta tractantes (velut Latinitatis perennis fata) commorationem ad finem adduxerunt.

Ad venturam Commorationem Seattlensem -- commorationi cuidam abhinc paene triennio actae similem -- incipiendam conveniemus undecima hora in illud maximum thermopolium Starbuckianum quod in Lacus Viridis extrema parte orientali situm est (7100 E Green Lake Dr N; 206-523-9594).
Transibimus deinde in popinam aliquam proximam, quarum sunt ibi satis multae, ut paulo post meridiem prandeamus. Haud scio an illa sit commendanda cui est nomen Craticula Mexicana Rositae ("Rosita's Mexican Grill"; 7210 Woodlawn Ave NE; 206-523-3031;
http://www.rositasrestaurant.com/ ).

Post prandium Hortos Zoologicos Silvestres (Woodland Park Zoo; 206.684.4800; http://www.zoo.org/ ) perlustrabimus. Qui in Lacus Viridis viciniam raeda longa advecti erunt, a privatam raedam habentibus in hortos vehi plane poterunt. Etsi illius pecuniae a societate Alcoa concessae, proh dolor, non iam exstat quicquam, pro novem tamen discipulis Collegium Vallis Aqualbensis, qua est liberalitate, introitus tesseras emere poterit.

**************************************
Stephen A. Berard, Ph.D.
Professor, Department of World Languages
Wenatchee Valley College
1300 Fifth Street
Wenatchee, WA 98801 USA
509-682-6738
sberard@wvc.edu
http://www.wenval.cc/boreoccidentales/boreo_latin/
**************************************

Informatio in pagina domestica L.V.P.A.e:
http://www.lvpa.de

***L.V.P.A.e SEMINARIVM XIII PRAGAE fiet in urbis Facultate Theologica et in studentium collegio!
31. 07. – 06. 08. 2006; argumentum: „De principe" (id est imperatore, rege, duce; poetarum principe …)
Inscriptio ante 31. Martium! Lectus reservabitur solum dimidia parte pecuniae transscripta!
mod. IPG, ipg@surfEU.de; prof. Bohumila Mouchova: mouchova@atlas.cz; dr. Iosephus Simandl

A die Lunae 31. Iul. 2006 (adventus, cena, salutatio omnium participum) ad diem Solis 06. Aug. 2006 (ultimum ientaculum, valedictio). Festum inaugurale fiet die Martis, probabiliter postmeridiano tempore, ut agenda et cantica melius et facilius praeparemus, festum finale die Sabbato vespertino tempore. Missa Latina celebrabitur in capella facultatis, sacerdos iam paratus, sed hora decernenda est.

Seminarium habebitur in Facultate Theologica, qua de causa doctor Iosephus Simandl nos maxime adiuvat. Vivemus in domo iuxtaposita, quae est maximam partem studentium deversorium, sed etiam in alia parte vastae domus deversorium continet cum conclavibus singulorum et binorum lectorum. Cenatio satis magna nobis erit, ubi prandium cenamque una sumemus, ientaculum erit in alio oeco, quem cum studentibus partiemur, id quod iucundum esse arbitror.

Pretia huius domus modo valde aucta sunt, tempore Euroni nihil comparare licet temporibus praeteritis. Exacta pretia postea divulgentur.Certum autem est inscriptiones ad seminarim fore coniuncta cum pecunia iam in antecessum missa, et hoc quidem duabus de causis:
(1) studentium collegium dimidium pretium ad Kal. Apr. poscit,
(2) L.V.P.A. nullum damnum accipere debet; his enim temporibus etiam pro illis qui nomen dederunt, sed non apparuerunt, solvendum est, aut pars pretii aut totum!

Solemus acroases de certa materia offerre, quae 2006 erit "DE PRINCIPE". Ille princeps potest esse quidam rex vel imperator, etiam princeps poetarum vel ... Placent themata adiuncta velut educatio principum vel theoria potestatis. Acroasis ne sit longior 35-40 minutis, ut disputationem adiungi sive quaestiones rogari permittatur.

Acroases omnibus destinantur, ut exerceamus capacitatem intellegendi ex audiendo. Oratores rogamus, ut schedam cum omnibus datis praeparent: insint titulus, nomina, annorum numeri, locorum nomina, mappae geographicae, bibliographia. Ita efficere volumus, ut auditores rem teneant, sperantes ut verba sequantur.

Alter scopus maximi momenti est capacitas loquendi. Sunt qui Latine iam bene sciant sed exerceri velint, sunt qui adhuc discant. Tironibus sint apti magistri, item eis, qui disputare malint.

Si quis autocineto proprio uti velit, videat ubi inveniat (in parte urbis boreooccidentali) nimis longam viam Evropská, quae ex foro centrali Pragae 6 (Vítězné náměstí, Forum Victoriae) ad aeriportum trahitur. In ceteris potest chartam nostram sequi.

Si quis tramine adveniat in stationem centralem (Praha hlavní nádraží), utatur traminibus subterraneis: primum cursu C, directio Háje, unam tantum stationem ad Museum; deinde cursu A, directio Dejvická, usque ad stationem terminalem, quae est sub foro Vítězné náměstí. Ascendat desubter velut si vult in eadem directione pergere, in qua tramen ferebatur. In ceteris itidem potest chartam nostram sequi. (Si quis scalas oderit, potest etiam tramine transviario, numero 26, inter stationes Hlavní nádraží et Thákurova vehi, minutas circa 35.)

Charta nostra praesertim pro eis adest, qui aeroplano venturi sunt. Nolite taxiraedis uti, notum est quia ibi alienigenae despoliantur, immo si minus, coronas circiter 800 poscunt. Decimā quaque minutā autoraeda longa numero 119 potest seminarii participem in proxima ferre, ubi habitatio praeparata erit; vehatur simpliciter de una terminali ad alteram, minutas circiter 25. Sat est ante aeriportum tesseras viarias emere; pro persona coronas 20, pro impedimento maiore coronas 10, et eas in curru assignare. Locus descendendi, pariter ac altera loca (HABITATIO, lectiones etc.) in charta data sunt.

Bene adveniant omnes.

***L.V.P.A.e BIDVVM XXVII (vernale): Jesuitarum libri de fato Indianorum
20. - . 21. 05. 2006 in LVHS Freckenhorst (prope Monasterium Westfalorum)
org.**I. Pessarra-Grimm, doc. *dr. Matthias Laarmann: lectio strenua et didactica!

***L.V.P.A.e BIDVVM XXVIII. (autumnale) de "Herode" Andreae Gryphii (1616 – 1664; */+ Glogoviae)
14. – 15. 10. 2006 Moguntiaci, "Erbacher Hof ". Inscript. ante 14. Iulium! Qui non venerit, solvet tamen!
org. Inga Pessarra-Grimm, doc. *prof. dr. Nicolaus Sallmann, qui textus excursionesque praeparabit.

Commorationum Seattlensium post initium firmum, etsi participum numero parcum, Novembri mense factum, altera praesentis anni scholaris congressio nostra, 21 d. m. Ian. habita, una fuit ex frequentioribus; nam interfuerunt in summa undecim, quorum plerique novi. Iam ut sessioni prolusoriae adessent, thermopolium angustius ita compleverunt mature advenientes ut sellae essent nobis undique prospiciendae. Advenarum quinque Iuniperae nostrae -- quae ipsa quoque aderat -- discipuli erant quos, quamvis tirones et interdum lingua haerentes, nihilominus nonnisi Latine loqui, vel loqui temptare, valde admirati sumus ceteri. Prandium deinde, sollemne Commorationis illius exordium, quadam sumpsimus in popina Mexicana tam quieta ut, praeter modos musicos Mexicanos suaviter perfluentes, quisque non modo cum sibi propinquis sed etiam cum toto grege sermones serere facile valeret. Post prandium, Museum Seattlense Artium Asiaticarum perlustravimus, nunc globatim, nunc omnes una tamquam in mystagogia musiva singula artificia tractantes, colores formas instrumenta argumenta alienos mores interpretantes, vocabula iusta memorantes, descriptionum in tabellis suppeditatarum frusta Latine vertentes. Relicto museo, animos corporaque recreavit "Hortorum Publicorum Voluntariorum" perlustratiuncula. Tunc, digressis plerisque, in theobromatopolio lautiore proximoque sito potiones bellariaque sumpserunt restantes quattuor: Angela, Brennus, Iunipera, Stephanus. Proxima de Commoratione, in 18 diem m. Feb. indictam, consilia aliquot sunt capta; aquarium publicum esse nobis invisendum decretum est. Brennus Stephanusque cibos postremo Thailandenses cenantes de litteris Latinis modernis deque perennem Latinitatem inuste absoneque spernentibus philologis collocuti sunt.
Ad venturam Commorationem -- Commorationi anni praeteriti mense Aprili felicissme peractae similem -- incipiendam conveniemus undecima hora in Thermopolium Sinus Elliott, quod situm est in hypogeo Bibliopolii Sinus Elliott (101 South Main Street; 206-682-6664; http://www.elliottbaybook.com/about/cafe/index.jsp ). Quod thermopolium -- ubi, praeter caffeam expressam exquisitam, apponitur sapidum opus pistorium glutine triticeo vacans -- nobis iam sat bene notum est, nam ibi iam aliquoties congregati sumus et ipsum amplum bibliopolium, in pediplanis situm, gratissime inspicimus.
Duodecima fere hora in aliquam ex popinis quarum multae sunt in illa vicinia atque in molibus portoriis proximis transibimus ut Latine usque loquentes prandeamus. Post prandium ambulationemque postprandialem duo suscepta iucundissima in animo habemus. Scilicet et Aquarium Seattlense (1483 Alaskan Way, Pier 59; 206.386.4300; http://www.seattleaquarium.org/) et proxime situm Museum Odysseïcum Maritimum (Odyssey Maritime Discovery Center, Pier 66, 2205 Alaskan Way; 206-527-4700; http://www.ody.org/newsroom/info_news_pr030705.htm) invisemus. In Aquario sane plurima piscium et crustaceorum et molluscorum et mammalium aqualium exempla scrutabimur. De quibus quo facilius colloqui possimus indicem aliquot vocabulorum appositorum huic nuntio adiunxi. Societas aluminica Alcoa pro discipulis participibus et forsan aliis tesseras aditiales emet.
Quibus confectis rebus, qui volent et qui ad plures horas colloquii Latini vacabunt satis matura hora (quinta sc. sextave) una cenabunt, forsan in caupona Italica nomine "Furnarius" (Il Fornaio). Hi homines me, Stephanum, ante diem 17 certiorem faciunto; nam si multi erimus, mensa nobis reservanda erit.
Praecepta Itineraria Aliquot:
Si per Viam Publicam 5 advectus eris, in Viam James exito et ad occidentem pergito. Ad Secundam Viam a sinistra manu videbis aedificium stativum cui est forma navis partim demersae. Si autem minus pro statione impendere voles, procedito usque ad Viam Alaskanam et locum statuendi sub Viaeductu quaerito. Si sinistrorsum flectens ad meridiem ibis, fieri etiam potest ut stationem gratuitam invenias. Bibliopolium Sinus Elliott situm est in angulo Primae Viae Aditialis et Viae Principalis Australis.
In proximum!
+++++++++++++++++++++++++++++++++++

Index Vocabulorum

gadus (piscis commūnis, cuius caro satis graviter sapit) (cf. Promontorium Gadinum Massaciusettanum)
hippoglossus, piscis cuius caro alba subtilius sapit nec xiphiae dissimilis est (Anglice halibut)
passer, passeris, m., piscis planior
perca, piscis flavidus fluviatilis
piscis, -is, m.
pistrix, pistricis, f. (sive pristix sive pistris sive pristis), squalus magnus
salmo, salmonis, m.
sarda, -ae sive sardina, -ae
squalus, maris praedator praecipuus cuius sunt plurimae species
thynnus
tructa, -ae
xiphias, xiphiae, m., piscis magnus rostro ensiformi

Crustācea et Mollusca

astacus, crustaceum marinum scorpioni simile
cammarus, parvum crustāceum caudātum plērumque marīnum
cancer, cancri, m., crustaceum marinum
locusta marīna, crustaceum marinum astaco simile, astacus spinosus
loligo, loliginis, f., molluscum decem tentaculorum > loligines (ferculum ex loliginibus frictis constans Graecis Italisque acceptissimum)
muscula, -ae, conchae genus extrinsecus nigrum ad violaceum colorem vergens
myax, myacis, m., concha communis marginem maris actaeque inhabitans (Anglice clam)
octopus, octopodis, m.
ostrea, concha margaritas parens
(argo)pecten, pectinis, m., crustaceum in cuius concha formose undulata Venus mari enascens depicta est
squilla, cammarus maior (Anglice prawn)

Mammalia Aqualia

**************************************

Stephen A. Berard, Ph.D.
Professor, Department of World Languages
Wenatchee Valley College
1300 Fifth Street
Wenatchee, WA 98801 USA
509-682-6738
sberard@wvc.edu
http://www.wenval.cc/boreoccidentales/boreo_latin/

Stephanus Berard