Finis somniorum de oeconomia libera universali?

Post quinque annos paciscendi sine ullo effectu finitus est 'circuitus Dohanensis' (a Doha, urbe Catarensi, ubi congressus oeconomicus mundanus anno 2001 habitus erat) negotiationum 150 terrarum mundi de portoriis minuendis, a Syndicatu Mercaturae Mundanae (WTO) ministratarum. Civitates in mercatura mundana praepotentes - USA, UE, Sinae, Iaponia, Brasilia et India - non potuerunt modos invenire portoria apud eas valentia mercibus necnon officiis importatis imposita ita minuere, ut omnibus simul placeret.

Maximi negotiationibus detrimenti sit 'bellum' inter Unionem Europaeam et Civitates Unitas Americae - altera pars altreram invicem ream calamitatis vocat, accusantes se non vero velle politicam protectionismi suorum agricolarum abolire. Rixa ambarum maximi detrimenti praesertim terris tertii mundi erit, quarum exportatores saepe non possunt portoria hodierna civitatum occidentalium solvere. Haec terrae pauperiores flagitaverunt, ut portoria mundana gradu 52% minuta, expensa autem agricolas protegentia gradatim revocata essent.

Portoria minuta, si secundum consilia praeterita WTO introducta essent, prodirent statim - ita saltem putat moderator generalis WTO Pascal Lamy (in photographema) - 66 milionibus hominum, hodie sub limine paupertatis viventium et insuper productum universalem annualem 100 saltem miliardibus eoronum augerent.

Scripsit Krakauer