Annus
2 0 1 4


Decimum annum perficit Ephemeris

Ephemeris post decem annos

Acta Latina per rete vulgata ante decennium primum edita sunt

Hic aspicitis paginam domesticam qua Ephemeris usque ad diem hesternum se ostendebat; quam magnitudine, coloribus et rubricis paulum commutavimus, ut decimum annum perfectum celebraremus.

Haec est autem prima pagina quae die duodetricesimo mensis Junii anni bismillesimi quarti in reti mundano apparuit:

http://ephemeris.alcuinus.net/archi2004/nuntii/eph1/index.php

Brevi tempore singularis inventio scribendi de rebus hodiernis lingua Latina, iam diu a nonnullis doctis Finnicis per radiophoniam incepta, per totum orbem terrarum per interrete vulgata est. Nunc omnes amantes linguae Latinae pro certo habent nuntios de plurimis rebus et scripta docta vel faceta in Ephemeride facillime comperiri posse, lingua antiquorum Romanorum expressa.

Historia nostra coepit a Stanuislao Tekieli Polono et Albino Francogallico Catalauniae incola qui, post scholas et greges interretiales Latine loquentium frequentatos, constituerunt aliquid novum creare ut lingua Latina, qua per tot saecula in tota Europa populi antea, postea docti ut sermone cotidiano usi erant, sicut corpus vivum et renovatum resurgeret. Multi studiosi necnon tirones in paginis Ephemeridis scribendis se exercuerunt, quorum nomina in amplis archivis nostris legere potes; de recentibus annis, Herimanno Novocomensi moderante, hic lege:

http://ephemeris.alcuinus.net/quisimus.php

Hodie Ephemeris decimum annum vitae suae perficit, quod minime ab initio credere potueris: nam solo sermonis Latini studio omnia quae hic invenitis scribuntur, plerumque noctu et diebus festis. Si quis linguae Latinae satis gnarus ad Ephemeridem ditiorem faciendam operam dare velit, nobis scribat

stanislawtekieli@hotmail.com

domus@alcuinus.net

Ut magistram doctissimam et amabilem, quae ab initio huic operae favit, grati honoremus, versus augurales Caeciliae Koch legite ante V annos redactos:

http://ephemeris.alcuinus.net/archi2009/nuntius3.php?id=551

Diu vivat Ephemeris, diu vivat lingua Latina, coniungendis populis apta!

 

 

Scripsit Herimannus Novocomensis



Retro ad:

Novissima editio
Summum paginae