Annus
2 0 1 3


Pontificem Franciscum cum praecessore oravisse

Pontificem Franciscum cum praecessore oravisse

Ante biduum res unica facta est quae, mirabilis visu, numquam acciderat in Ecclesiae Catholicae bismillenaria historia: Summus Pontifex nuper electus praecessorem, Papam emeritum qui munere se abdicaverat, convenit. Papa Franciscus se Castrum Gandulphum contulit ubi in aëriportu elicopterorum receptus est a Benedicto XVI, antequam inter se complexi essent. His verbis Pater Fredericus Lombardi de re suam sententiam tulit: “Occasio fuit maximae et altissimae communionis”. “Colloquium tempus Papae Emerito dedisse renovandi oboedientiam et reverentiam successori nec non Pontifici maximas gratias agendi praecessori pro Ministerio effecto”.

Bergoglio et Ratzinger simul ad Domum Apostolicam contenderunt ut in tablino colloquerentur et prandium cum suis secretariis sumerent. Deinde cum oratum adissent in sacellum Castri Gandulphi, Benedictus Pontificem considere vellet in genibus flectendis scabello Papae sed Papa maluit ambos ad oratum simul considere, “ut fratres”. Pater Lombardi addidit primum eos inter se convenisse, sed toties Pontificem animum advertisse ad praecessorem atque hunc iam antea professum esse se Papae oboediturum. Tandem Pontifex Franciscus Papam Emeritum donavit Sacra Icone “Virginis Humilitatis”, quam Benedictus animo commotus accepit, maximas gratias agens.

Scripsit Lydia Ariminensis



Retro ad:

Novissima editio
Summum paginae