Constantinopoli populi motus repressi sunt

Etiam die Solis post meridiem Constantinopoli custodes publici cum collegis ex aliis provinciis arcessitis gasis lacrimigenis et aqua proiecta iuvenes repulerunt, qui convenerant reclamantes contra conventum praesidentis Recepis Erdogan fautorum: nam in foro Constantinopolitano convocata erat a factione AKP multitudo acclamantium, ut plerosque urbis incolas regimini assentiri ostenderetur, qui violenter Saturni die plateam Taxim a milibus occupantium liberavisset.

Perturbatio die XXVIII mensis praeteriti coeperat: silva Gezis enim quae iuxta forum Taxim florebat ex voluntate regiminis excidenda erat, ut in eius loco aedificia publica et emporium exstruerentur. Multitudo ibi congregata in arboribus castra posuit (ut in imagine inferiore aspicitur) operae initio obstans: mox in alias Turciae urbes, praesertim Ancyram et Smyrnam, reclamationes contra gubernatores pervaserunt, qui recenter invisam legem imposuerant contra potiones alcoholicas bibendi libertatem. Postquam custodia publica frustra castra quieta amovere conata erat, Idibus Juniis praesidens Recep Erdogan postremum oppositores monuit ut recederent, se occupationem illicitam non amplius toleraturum adfirmans. Postridie copiae a gubernatoribus missae gasis lacrimigenis, aqua proiecta et glandibus cummeis occupantes adgressae sunt, centenos comprehendentes, vel tabernacula ubi sauciati confugerant ineuntes medicosque, qui sua sponte ad illos curandos se contulerant, percutientes. Summatim quattuor homines occisi a perturbationum initio referuntur, quinque millia vulnerati.

Etiam Ancyrae die Solis custodes publici ad reclamantium multitudinem dispergendam gasis lacrimigenis et aqua proiecta usi sunt.

Scripsit Herimannus Novocomensis