Quomodo rei politicae contentio...

... odium phyleticum excitare atque alere possit.

Biduo post visitam Bergomi Caeciliae Kyenge Administrae Italicae natione Congolensis praepositae diversorum generum hominum Coniunctioni, quo die factio Foederis Septentrionalis fecit ut aëronavis supra oppidum volaret ostendens amplissimam teniam in qua scriptum esset “Iam satis est de peregrinis!”, Vicarius Praeses Senatus Robertus Calderoli affirmare ausus est Tribus Villis (Italice Treviglio)   in conventu factionis de qua supra diximus: “Quotienscumuque Caeciliam Kyenge conspicio facere non possum quin cogitem de pitheco satyro”; “Melius fungeretur Administrae munere in Africa: per eam tot migrantes huc ut in Americam advenire exoptant”.

Quibus verbis iniuriisque Henricus Letta Minister Primarius Italicus inter alios indignatus est qui maximum consensum Administrae patefecit. Etiam Praeses Rei Publicae Georgius Napolitano vehementer rem improbavit una cum plurimis auctoritatibus rei publicae qui nuntios Caeciliae miserunt ut solidam coniunctionem conferrent. Tandem Robertus Calderoli ab Administra veniam petivit telephonice afferens ut causam excusationis quod contionatoris sententiam coram populo dixisset. Sunt qui putent ob gravissimam iniuriam erga civem Italicam et feminam nigrocolorem sed etiam Administram ei munere abdicandum esse.

Hac discriminis economici et socialis aetate odium in eos qui alia sentiunt de rebus publicis saepe ut elatio phyletica discriminatrix ostenditur, tamquam reditus ad tempus praeteritum verbis, non re, ab omnibus damnatum etiam in civitatibus democraticis.

Scripsit Lydia Ariminensis