De mira migrantium caede

Ex Misrata oppido Libyco profectus, linter biduum per mare profugis Somalis et Erythraeis refertus transvectus est: qui tandem ignem succenserunt, ut se adiutorum oculis obicerent postquam tres naves piscatoriae praeterierant. Sed propter benzinum antea dispersum incendium exortum est: dum flammae lintrem comburunt, migrantes plerumque natationis imperiti haud longe a Lopadusa in mare se deiecerunt terrore capti. Milites Italici cum maris custodibus necnon compluribus piscatoribus animose succurrerunt multos e morte eripientes, plures exanimatos viros mulieres pueros puellas ex aequore extrahentes.

Minister primarius Italicus Henricus Letta totius Italiae luctum indixit; cuius vicarius Angelus Alfano Lopadusam se contulit, ubi iam CXXX cadavera servantur. Pontifex Franciscus pudendum esse dixit, ad orationem pro victimis adhortans; rei publicae Italicae praesidens Georgius Napolitano se dixit tam horrore quam pudore affici.

Scripsit Herimannus Novocomensis