Adversator Russus e carcere dimissus est

Vir ditissimus Michaël Khodorkovsky e carcere dimissus est remissa poena a Vladimiro Putin “humanis sensibus” impulso. Causa cur reus clementiam quaesierit matris morbus, ut ait praeses Russiae. De qua re tamen patronus nihil declaravit. Qui praefuerat maximae societati petroleariae “Yukos”, opulentissimus e Russiae civibus, vectigalium effugii condemnatus, in vinculis decem annos manserat. Cum regiminis adversator esset, totiens quominus veniam peteret recusavit: quod idem quasi crimen fateretur esset. Societas Russiae nuntiorum communicationis (Ria Novosti) rettulit captivorum aliqua milia veniam mox usurpaturos esse.

Cum solutus Berolinum venisset Michaël Khodorkovsky tandem se post decem captivitatis annos confirmavit clementiam petiisse, nullam culpam tamen confessus. Ut relatum est a nonnullis actis diurnis, ille hoc fecisse videtur munerum secretorum virorum hortatu qui ferantur eum monuisse de matris aegritudine ac novo iudicio in eum parato.

Quo modo rei politicae periti hoc interpretantur? Sunt qui putent Putin cepisse interna clementius administrare ad pervulgationem commendaticiam cum ludi Olympici hiberni apud oppidum Sochi immineant. Non tamen neglegendum est Praesidentem Russiae cum collega Americano Obama benevolentia et liberalitate certare velle qui adversus leges Russiae homophobicas feminam homosexualem ad ludos mittet ut Civitatum Americae Unitarum imaginem exprimat.

Scripsit Lydia Ariminensis