Denuo perturbatur Respublica Turcarum

Veneris die Constantinopoli astyphylaces turbam civium in foro Taxim congregatam et "arripe furem!" conclamantem adgressi sunt vaporibus lacrimigenis et sphaerulis cummeis; similia facta etiam ex Ancyra et Smyrne narrantur.

Fur ille est minister primarius Turcarum Recep Erdogan (quem in imagine adposita aspicis) cuius abdicationem postulatur, nam multi homines corruptelae et pecuniae illicite in Persidem translatae accusati in vincula coniecti sunt, inter quos filii trium ministrorum regiminis ab ipso ducti: qui propterea officium suum abdicaverunt. Sed Recep Erdogan se sellam gubernatoris supremi servaturum esse proclamat, obtrectationis causa ab iudicibus corruptis inquiri, factioni suae AKP a populo suffragiis municipalibus imminentibus latius assentiendum esse.

Propter tanti momenti investigationes pretium nummi Turcarum magnopere deminutum est, si cum dollario Americano comparetur.

Scripsit Herimannus Novocomensis