Septimana Lutetiensis (III)

... ab Herimanno eiusque filio adolescenti peracta

Dies Lupariensis (Musée du Louvre) longior et mirabilior est, quam enerrari potest: pauca commemoranda videntur, non quidem optiima sed mihi illo die gratissima, vel animi consonantia vel illectamento:

parvae statuae aetatis neolithicae Terram Matrem effingentes,

Venus Melia ex marmore Pario,

coniuges Etrusci supra sepulcrum suum iacentes, qui sereno animo mortem aspiciunt,

Sanctus Franciscus stigmata recipiens a Giotto effictus,

Cosmae Tura Christi depositio,

tres Leonardi tabulae pictae iuxta adpositae, id est Virgo Rupium, Sancta Anna cum Maria parvulis Jesu et Joanne, Joannes Baptista adolescens,

Raphaëlis Sanctus Michaël,

Eros et Psyche,

Simiarum venatio glutinaria, auctoris Flandrici.

De ultima opera lineamentis efficta, hoc apud imaginem inscriptum erat: invasores Flandricos in media Africa in pateris aquae plenis manus pedesque coram simiis lavare solitos esse; aemulationis gratia idem faciebant simiae, quibus paterae non aquae sed glutinis plenae praebebantur: artubus ita movendis ineptae, miserae bestiolae facile comprehendebantur et in urbes Europaeas transvehebantur.

Sed ipsi visitatores Musaei Lupariensis spectaculum praebent: viri et mulieres ex toto orbe terrarum, quibusvis vestimentis induti, neglegentes aut stupore perculsi, imaginem photographicam invicem imprimentes prope Dominam Lisam vel Niken Samothracicam: populus est rerum noscendarum studiosus, minime rudis - suo quisque modo -, in amplissimo aedificio multas horas sine requie pervagans.

Postquam inde eximus et paululum deambulamus, refulget Theatrum Lyricum Nationale (Opéra national de Paris) et magnitudine et auro immoderatum; pone redundat luxuria Emporii Lafayette (Galéries Lafayette).

Parcius cenamus pomis terrestribus frictis et cervisia obscura Hibernica, dum apparatus televisificus certamen pedifollicum transmittit: voluptas virorum propria.

Scripsit Herimannus Novocomensis