CINEMATA
IN DOMO ALBA ANGELI NON EVOLANT
A Casablanca les anges ne volent pas
Scripsit Herimannus Novocomensis
Pellicula filmica Mohammedi Asli. Cum: Abdessamad Miftahalkhair- Abderrazzak el Badaoui - Laila el Ahyani - Rachid el Hazmir - Abdelaziz Esseghyr...
 Auctor pellicularum in Maroccho ortus Mohammed Asli primum opus, adiuvante Italico Instituto cinematographico "Luce", undequinquagenarius edidit.
Narrantur vices trium virorum qui operam dant apud tabernam refectoriam maximae urbis Marocchi Domus Albae (Casablanca), exigua salaria familiis suis longe habitantibus mittentes: suum quisque somnium duro labore alit.
Othman Berberorum more vult equum suum fortem ac validum fieri: sic dilapidantur mercedes eius.
Ismail crepidas sumptuosas cotidie in tabernae cuiusdam fenestra admiratur, omniaque sacrificare cupit ad illas emendas.
 Said mulierem cum puerulo in misera casa inter nives montis Atlantis dereliquit: cui feminae iterum parturienti adsistere tabernae dominus inhumanus non permittit.
Admiratur spectator tres vitas dimidiatas, dura sacrificia hodie tolerata ad bona futura obtinenda: quorum bonorum suum cuique denegabitur, frustrata omni spe. Tantum religio lumen tenue in extremis imaginibus reddit.
Optime dirigit Asli: varios animi motus alterna vice experitur spectator, nec deest risus in tanta maestitia, nam iuvenis Ismail crepidas splendidas per pulverulentas et frequentes vias Domus Albae praeservare conatur.
Mirabilis etiam musica Arabica, stuporem autem excitant albi montes, ubi mulier Said vitam in egestate degit: tantam vim nivis in Africa vix inesse credideris!
Si potueritis, aspicite quaeso hanc miram pelliculam filmicam!
FABULA DE CAMELO PLORANTE
Scripsit Herimannus Novocomensis
Rexerunt: Luigi Falorni, Byambasuren Davaa
Cum: Janchiv Ayurzana, Chimed Ohin, Amgaabazar Gonson, Zeveljamz Nyam, Ikhbayar Amgaabazar, Odgerel Ayusch, Enkhbulgan Ikhbayar, Uuganbaatar Ikhbayar, Guntbaatar Ikhbayar, Munkhbayar Lhagvaa, Ariunjargal Adiya, Dogo Roljav, Chuluunzezeg Gur...  Quis vestrum vidit umquam camelum parturientem? Pauci, puto. Si autem pelliculam "Fabulam de camelo plorante" videritis, hoc singulare spectaculum nulla re abdita, vel - ut dicitur - nucleo rigido ("hard core") aspicietis.
Duo discipuli Academiae Televisionis et Pellicularum Monaci Bavariae (Hochschule für Fernsehen und Film), Byambasuren Davaa, mulier ex Mongolia, et Italicus Luigi Falorni, hanc fabulam longinquis in desertis Mongoliae agunt, vitam nomadum uni et vicesimi saeculi in tabernaculis viventium ut in scientifica descriptione effingentes.
Vere incipiente, familia quae Mongoliae deserta Gobi incolit, anxie exspectat partus camelorum, ex quibus vita sua tota pendet; camelus quaedam iuvenis, primum procreans, album pullum magno cum labore gignit eumque reicit: qua re plorat sine ulla spe albus camelus. Quid postea eveniat narrare non oportet, ne voluptas spectatorum evanescat.
In lucem tamen proferenda sunt locus, modus vivendi, iter in urbem.
 Loca singularia et fera sunt deserta Gobi, sub montibus nive candidis imminentibus, arena saxis vepribus operta, ubi vita necessariis rebus restituta est: vitam agunt pastores camelos et oves alentes, puteos effodientes, circum mensam se congregantes, liberos educantes, deos antiquos colentes. Interdum furit sabuli procella omnesque congregantur, meliora exspectantes.
Sed non est haec familia nomadum mundo omnino resecta: fidi cameli per solitudines ad urbem liberos vehunt, ut forum mercibus novis refertus visitare possint, ut praecipue televisificum apparatum, quem avus "imagines vitreas" contemnens appellat, aspicere et desiderare: lento gradu nova tempora solitudinibus Mongoliae appropinquantur.Haec est pellicula mirabilis, naturam homines animalia ut mundi unius partes ostendens: nullo modo spectatorem turbat Mongolica loquela, conversione subscripta intelligenda.
ULTIO SITHORUM
Scripsit Stanislaus Tekieli
 Septentrioamericana pellicula a Georgio Lucas directa. Cum Hayden Christensen, Ewan McGregor, Natalie Portman, Ian McDiarmid, Samuel L. Jackson, Anthony Daniels, Kenny Baker, Peter Mayhew...
Olim oliorum longinqua in galactica... multa evenerunt. Nuper tamen (vi fere ab amica coactus) „Bellarum stellarium" fabulae illius Georgii Lucas partem tertiam "Ultio Sithorum" inscriptam inspexi, fautor enim fabularum ficticiarum nominari nullo modo possim. Tempus contra opinionem satis bene peregi, quia architectus in pectore sum, ob inscientiam tamen maximam mathesis et omnium *scientiarum durarum* (ne dicam artis delineandi) disciplinae huic studere in universitate non potui (et bene, obruererent ista aedificia a me structa). At aedes urbis capitalis Rei Publicae Galacticae nec Singapurienses nec Kualalumpurienses quidem architecti, quorum imaginatio fine carere videtur, excogitare possint! Item "architectura" navium cosmicarum – amatoribus militariorum res gustatu suavissimae.
Aliter fabula nullo modo intentem me tenuit, nam historiam Devadattae discipuli illius malitiosi Buddhae longe abhinc sciveram et multo plus, fateor, mihi illa placebat quam mutatio eius Lucasiana. Ita usque ad finem alternato animo considebam, modo aedes aestimans modo in somnium cadens, cum statim intelligerem pelliculam hanc… motui Latinitatis vivae valde utilem esse! Nos enim cum semimortua lingua nostra in eo momento temporis sumus ut magister Yoda cum disciplina eius Jedi nominata, cum, clade maxima ei suisque affilcta, in exsilio abditum petens proficiscatur, murmurans illud: Failed I have (Victus ego sum).
Sicut equites Jedi, nos Latinistae victi sumus a linguis moribusque hodiernis. Sicut Yoda et pauci equitum e caede servatorum, nos in parvulis gregibus totum per orbem sparsis disciplinae nobis sacrae, ab aliis tamen tam irrisae, quasi in occultu studemus. Est certe nunc tempus nobis caute cogitandi quomodo in lucem et ad gloriam priscam Latina sit reducenda.
Una re amatores „Bellarum stellarium" nobis praestant: partibus fabulae reverso modo a Lucas expositis evenit ut sciant omnes bonitatem in fine victuram disciplinamque Jedi servandam. Nos tamen rerum futurarum omnino incerti sumus, defesso plerumque animo incedimus, immo peiora fieri timemus, gnari res praeteritas non esse revertendas.
Nihilominus, sit potestas nobiscum!
MERCATOR VENETIARUM
Scripsit Herimannus Novocomensis
 Septentrioamericana pellicula a Michaeli Radford directa. Cum Al Pacino, Joseph Fiennes, Jeremy Irons, Allan Corduner, Charlie Cox, Mackenzie Crook, Gregor Fisher, Radica Jovicic, Kris Marshall, Zuleikha Robinson, Tony Schiena, John Sessions...
Auctor Michael Radford in pelliculam filmicam reduxit comoediam Wilhelmi Shakespeare, quae "Mercator Venetiarum" appellatur. Haec comoedia, cum iucundum et celebre opus Britannici scriptoris habeatur, post alterum mundi bellum raro in theatris agitur: nam contemptus et ludibrium Iudaei feneratoris Shylock totam narrationem percurrit, quod post terrificam caedem Iudaeorum "Holocauston" denominatam quemvis offendere possit.
In brevi prologo tamen explicat auctor, qui narrationem direxit, Iudaeos in urbe Venetiarum declinante saeculo decimo sexto infames haberi: quibus, si in fide patrum manserant, nihil possidere licebat et solae fenerationi spes lucrandi dabatur.
"Mercator Venetiarum" fabula est, in qua invisi oderunt, quia invisi sunt, amati amant, quia amantur, nec ulla communicatio amoris et odii fieri potest. Fenerator Iudaeus Shylock (in hac pellicula a mirabili Alexandro Pacino actus), a Christianis vexatus et contemptus, ultionem mirabilem invenit, unam libram carnis ex corpore mercatoris Antonii resectae pro debito insoluto postulans; Antonius tantopere amicum Bassanium diligit, ut vitam amittere toleret eius felicitatis gratia; item mutuus amor vinculo coniungit Bassanium eundem et nobilem Portiam.
Omnia circumdant Venetiae, urbs ubi sors uniuscuiusque facillime mutatur et odium insanabile homines dividit, tenebris circumfusa et scortis adnictantibus pullulans, pretiosis vestibus refulgens.
Plerique diurnarii, qui de hac pellicula opinionem suam scripserunt, nimis similem operae pristinae eam censent et personas nulla ambiguitate praeditas parum credibiles.
|
|
