|
|
|
NUNTII 
De Cusairis obsidione
 De Cusairis obsidione
Die Solis acriter pugnatum est Cusaire (Qusaŭr), in
oppido Syriae occidentalis: reipublicae rete televisificum
nuntiat copias a praesidente Assade missas nonnulla aedificia ab
rebellium potestate recuperavisse, quod oppositores negant. Etiam
Libanenses, qui iam diu Syriacis commixti ibi vivunt, proelio
interfuerunt: "Sectatores Dei" (Hezbollah)
regimini Damasceno faventes, Sunnitae rebellibus.
Cum oppidum proximum sit finibus Libani, illac regimini
Syriaco transit accessus magni momenti ad litora mediterranea;
oppositoribus contra magno auxilio sit communicatio cum sociis
Libanensibus: quam ob rem ambarum partium magni interest loci
possessio.
A mane ad vesperum exercitus, qui recentibus septimanis oppido
circumdatus erat, bombardis pyrobolos proicere coepit,
quinquaginta homines tum inermes cum armatos occidens, CCCCL
circiter vulnerans. Suos quisque nuntios de exitu refert:
rebelles nulla fere aedificia hodie deleta esse imaginesque
divulgatas prius diruta effingere narrant, regimen tromocratas
(ita enim rebelles appellat) ex municipii sede expulsos esse.
Scripsit
Herimannus Novocomensis - 19/05/2013 20h35
|
|
BREVES
POLITICA
IN ORBE
INSOLITA
POLITICA
SCIENTIAE
|
