De musicis visitantibus

(Bikur Ha-Tizmoret - The band's visit)

Israël anno MMVII

Direxit, scripsit et in scaenam reduxit Eran Kolirin, pelliculam exstruxit Arik Lahav Leibovitz, scaenas exstruxit Eitan Levi, histriones delegit Orit Azoulay, sonitum curavit Itai Eloav, imagines curavit Shai Goldman, musicam curavit Habib Shehadeh Hanna, vestimenta curavit Doron Ashkenazi, partes maximi momenti egerunt: Sasson Gabai (tribunus militum Tawfik Zacharya), Ronit Elkabetz (cauponae domina Dina), Saleh Bakri (Khaled), Khalifa Natour (Simon), produxerunt July August Productions, Bleiberg Entertainment, Sophie Dukac Productions, distribuit Mikado.

Quomodo Arabes et Iudaei inter se colloqui idemque sentire possunt? De hac re brevi et venusto cinemate, primo a se confecto, agit auctor Israëlianus Eran Kolirin.

Octo musici ex publica disciplina Alexandriae, magnae Aegyptiae urbis, iter in Israël faciunt: quorum officium est domum publicam Arabicae culturae dicatam in urbe Iudaeorum Petah Tikva inaugurandam canendo celebrare. Cum autem in aëriportu neminem se accipientem compererunt, publica autoraeda iter pergunt: sed propter erratam urbis dictionem haud in urbem sed in parvum vicum media in solitudine perveniunt unde abire non possunt nisi nocte peracta. In domibus ergo humanorum Iudaeorum hospitio accipiuntur, iter postero mane perrecturi.

Diuturna est nox et suavis, qua inter se communicare conantur homines invicem ignoti: cum musica et lingua Anglica primum nexum sinunt, tum mox alter alteri animi sensus recordationes poenas desideria adeo patefacit, ut humana condicio tam alienis mortalibus communis esse comprobetur. Praestat inter omnes prudens amicitia tribuni militum Tawfik, symphoniae dirigentis, et Dina, fortis et liberae cauponae dominae: quorum alter alteri noctis tenebris faventibus vitae suae vices enarrat. Mane musici ex hospitalibus domibus proficiscuntur, sed uniuscuiusque mens commutata est postquam invisi alienigeni sensus tam suis similes esse cognovit. Denique mira musica Arabica in urbe illa, quo symphonia ab initio se contenderat, Aegyptiis et Israëlianis vexillis agitatis, auctoris spem amicitiae demonstrant. Qui de opera sua haec scripsit:

"Permutavimus verum amorem cum unius noctis fugaci libidine artesque liberales cum mercatura, hominum nexuum et colloquendi miraculi obliti. Hoc tantum nobis cordi est, quantum ipsi offae arripere queamus."

Scripsit Herimannus Novocomensis

Michaël Clayton

Leones pro agnis

Quod in me optimum est (Lo mejor de mí)

Redi, cara iuventas!

Vitam aliter fieri posse