|
|
|
NUNTII 
SOLUSNE INFANDA PATRAVIT?Auctor caedis Nicaeae cum aliis stragem paravit
Ante biduum Tunisensis nomine Brahim Issaou cultro occidit in Cathedrale
Nostra Domina in media urbe sita aedituum et duas feminas: prior intus
trucidata est, altera gravissime vulnerata in thermopolium confugit, ubi
animam efflavit amore filiorum commemorato. Reus a biocolytis sauciatus, in
nosocomium translatus est.
Petitio terroristica rei politicae odio accensae inseritur post capitis
amputationem magistri Parisini Samuel Paty qui discipulis distortas imagines
Maometi actis Carolo Hebdo editas ostenderat. Praeses Emmanuel Macron
sermone funebre habito affirmavit se non intermissurum bellum pro libertate
nec imagines satiricas recusaturum. Praetera nullam separationem
Islamicorum fore, frequentes in meschitis inspectiones. Quod excitavit
nationes Islamicas, praesertim Praesidem Turcorum Recep Tayyip
Erdogan, qui accusavit Macron quod insanus esset, de odio in Europa contra
sectatores Mahometi, quin etiam eorum status par extaret Hebraeis sub
nazistorum regimine. Praeter Turciam aliquae nationes Medii Orientis cum
Francogallia commercii interclusionem nuntiaverunt. Solum Arabia Saudita e
contrario monuit ne res Turcorum emerentur. Unio Europaea videlicet Ancyram
hortata est ut impulsu adversus Francogalliam desisteret pro tolerantia ac
laica libertate.
In hoc rerum statu nova petitio terroristica in Francogallia facta est.
Jihadista Tunisinus infandi sceleris auctor inter migrantes in insulam Lopadusam
conscenderat, postea Barium translatus, expellendus ab Italia erat, sed se
abdiderat. Ignoratur quomodo in Francogalliam adierit. Non solus verisimiliter
horrendam caedem Nicaeensem struxit. Tres in Francogallia comprehensi sunt
ut suspectos societatis sceleris. Nuper grex extremistarum Tunisiae
meridionalis "Al Mahdi" sibi incursum terroristicum vindicavit.
Religio saepe saeclis praeteritis causa belli et contentionum fuit. Ad ea
vitanda hoc tempore adfirmare licet nullam fidem deridendam esse in tanta
mentium diversitate nec pro fide insontes necandos.
Scripsit
Lydia Ariminensis - 31/10/2020 23h33
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
