|
|
|
NUNTII 
De Augusti Pinochet interitu
 De Augusti
Pinochet interitu
Solis die in nosocomio militari Sancti Jacobi dictator Chiliae
Augustus Pinochet, XCI annos natus, mortem obiit. Ibi a die III
huius mensis a medicis curabatur, quod corde graviter aegrotaret.
Celeber factus est a. d. III Idus Septembres anni MCMLXXIII,
cum praesidentem socialisticum Salvatorem Allende, populi
suffragiis libere electum, loco manu militari amovit: posthac
usque ad annum MCMXC dictator ferus rei publicae Chiliae fuit. A
rectoribus USAe clam auxilio donatus, quamvis eum Allende ipse
exercitus imperatorem summum paulo ante fecisset, palatia
regiminis aeronavibus aggressus praesidentem ad sese
interficiendum coegit, si vera narrantur. Ita tyrannus saevus
factus est: tortiones comprehensiones homicidia raptus tam
innumerabiles ipsius ceterorumque ducum iussu facta sunt, ut
nefarium exemplum cunctis dictatoribus Americae Latinae
haberetur.
Anno MCMLXXXVIII populus comitiis habitis Pinochet facultatem
negavit diutius imperium gerendi; post biennium summam rerum ipse
reliquit. Frustra conatus est iudex Hispanicus Balthazar Garzon
eum in iudicium deferre; postquam in Chiliam reverterat,
tribunalia effugit et immunitate senatoria et aegritudine et
provecta aetate: a nullo iudice iudicatus diem supremum obiit.
Scripsit
Herimannus Novocomensis - 10/12/2006 22h59
|
|
BREVES
IN ORBE
SOCIALIA
POLITICA
OECONOMIA
OECONOMIA
|
