|
|
|
NUNTII 
De bello contra Talibanos perficiendo
 De bello contra Talibanos perficiendo
Vallis Suatica (Swat valley), in Pacistania septemtrionali, magnis copiis obsidetur: milites a regimine missi in dies provincias occupant et pyrobolis sepultis purgant; interdum dimicatur in viis Mingorae, maximi vallis illius oppidi, quod si cito occupatum erit, victoria exercitui praesto erit. Plerisque armamentariis iam deletis milites oppidum circumdederunt et maxima compita occupaverunt, haud excepto Foro Viridi ubi Talibani complures damnatos supplicio afflixerant. Nuntius exercitus dicit oppidi liberationem lente ac prudenter perfectum iri, quod Talibani in singulis viis et aedificiis exquirendi et comprehendendi sint. Sed in multis vicis proelia et dimicationes intermissa non sunt. Etiam in aliis partibus vallis Suaticae exercitus Pacistanorum progressus est, oppidum Mattam occupans. (in imagine adposita profugi aspiciuntur)
Populus bello contra Talibanos favere putatur, qui incolas lege islamica severe opprimere soliti sunt; sed victoria celeri et integra opus est ne spes liberationis evanescat neu fides gubernatorum concidat, nam ab initio invasionis ex regione illa quindecies centena millia circiter incolarum aufugerunt: Civitates Americae Unitae firme bellum contra Talibanos sustentant et profugis commeatus suppeditant, sed non in aeternum.
Scripsit
Herimannus Novocomensis - 24/05/2009 15h35
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
