|
|||||||||||
|
|
NUNTII 
MERCENARII AFRICANI CONDICIONI SUAE RECLAMANT Tumultus in Calabria
Aliquem in aera sclopetavisse, ut mercennarios depelleret familiamque suam defenderet, statio emissoria Sky TG24 nuntiavit. Plura centena civium convenisse, ut contra reclamarent; quorum multos lapidibus sclopetis fustibus immigrantes tam vehementer aggressos esse, ut ea res in actis diurnis «venatio nigrorum» appellaretur. Georgius Napolitano, praeses rei publicae Italicae, de violentia aucta sollicitatus poposcit, ut iniuriae quam primum finirentur; Robertus Maroni, minister rerum internarum factionis Ligae Septemtrionalis (Lega Nord) – quam factionem peregrinis inimicissimam esse constat – dixit haec evenisse, quod consilia ac rationes ad rem immigratoriam spectantia nimis diu falsa fuissent. Praeterea plures in hoc oppidum vigiles missum iri. Causa seditionis fuit, quod vesperi Iovis diei ex autocineto in mercennarios quosdam ex citretis redeuntes sclopetatum est; qua re complures vulnerati sunt, ex quibus unus tam graviter, ut in valetudinarium ferendus esset. Maroccanus quidam lacrimis perfusus „in nos sclopetaverunt“, inquit, „at nemo nobis adfuit“. CL fere advenae die Iovis ad multam noctem vias intercludebant, fenestras confringebant, autocineta incendebant, dum compluribus horis post a vigilibus publicis seditio coerceretur. Mercennariorum condicio miserrima est: in officinis pristinis aut in casis simplicissimis habitant, sine stragulis, sine lumine, sine calefactione. Haud raro fit, ut ducenis una tantum latrina suppeditet. Medicus quidam sodalitatis auxiliaris, cui nomen „Medici sine confiniis” (Médecins Sans Frontieres), «et ego, ut qui in regione Darfur laboraverim», inquit, «vehementer percussus sum, cum video, quomodo isti vivant». Tamen, quod status eorum non legitimus est, exigua quoque mercede laborant, id est XX fere Euronibus singulis diebus, haud raro minore. Quin etiam fit, ut Mafia ex ea mercede quinque Eurones pro «vectigali moratorio» retineat. Quamobrem magistratus putant mercennarios a factiosis Mafiae Calabrensis oppressos esse, ut pro “vectigali” negato punirentur. Scripsit Volfgangus Austriacus - 10/01/2010 11h53
|
BREVES
HOMINES
IN ORBE
VALETUDO & MEDICINA
SOCIALIA
HOMINES
|
|||||||||
Cum mane MM fere
advenarum, quorum maxima pars ex Africa immigraverat, in forum
oppidi Rosarno in Calabria siti convenissent, qui condicioni suae
inhumanae reclamarent, die ipso Veneris maximae inter
mercennarios et indigenas discordiae ortae sunt. Mercennarii
indignati a praefecto vigilum petiverunt, ut vim continuatam
atque ad genus suum spectantem a se prohiberet. Se nulla alia de
causa huc venisse, ut laborarent. Cum nonnulli eorum fenestras
confregissent receptaculaque rerum abiectarum deiecissent, cives
vi ac terrore responserunt.
