|
|||||||||||
|
|
NUNTII 
Impetu Americanorum imminente Afghani in fugam se conferunt
De regione Helmand e multis annis inter Talibanos et copias confoederatas pugnatur. Tamen Britanni anno MMVI indutias cum Talibanis fecere, cum milites utrique parti deessent, a quibus immanes solitudines continerentur. Nick Carter Britannus, qui summum hoc bello imperium obtinet, dixit hoc impetu novas belli Afghaniensis rationes , quas Baracus Obama inisset, probatum iri. Nam Americani non iam recusant, quin cum Talibanis colloquantur, dummodo vi et iniuriis se abstineant. Simul autem dicunt timendum esse, ne vis eorum prius etiam crescat, quam ita extenuati sint, ut colloquiis habendis assentiantur. Non est dubium , quin Talibanis magno detrimento esset, si provinciam Helmand amitterent, quippe cum ex ea provincia dimidium fere opii , quod in orbe est, importetur. Scripsit Volfgangus Austriacus - 09/02/2010 14h59
|
BREVES
HOMINES
IN ORBE
VALETUDO & MEDICINA
SOCIALIA
HOMINES
|
|||||||||
Impetu Americanorum imminente ingens hominum
multitudo e provincia Helmand in Afghanistania meridionali sita
in fugam se dat. Vehiculis rebus ad vivendum necessariis onustis
regionem circum Marjam sitam relinquunt; quae urbs in potestate
Talibanorum est. Haud procul magnae Americanorum Britannorumque
copiae impetum parant.
Proximis diebus Britanni una cum Americanis
Afghanisque castra in Talibanos movebunt; qui impetus, cui nomen
„Moshtarak“ (i.e. viribus unitis) datum est, nescio an
maximus huius belli futurus sit.
