|
|
|
NUNTII 
De Japoniae calamitatibus
 De Japoniae calamitatibus
Nusquam
post hominum memoriam tam vehemens terrae motus factus est, ut
Veneris die in Japonia septemtrionali: nonus enim gradus
Richterianus attactus est in alto mari, magno cum urbium et
vicorum damno; undae ex oceano, quas Japonici "tsunami"
appellant, loca litoranea demerserunt neque plurimi motus
subsequi desinunt. Auctoritates DCC incolas interiisse publice
communicant, constat tamen longe maiorem fore victimarum
computationem. Decem milia hominum Rikuzentakada, in oppido
maritimo, evanuisse videntur.
Cum
aedificia iuxta regulas antiseismicas exstructa quassibus
restitissent, undae ex alto mari ortae, usque ad decem metra
procerae, vias domos officinas invaserunt et magnam copiam
indigenûm interfecerunt. Fukusimae in officina electronucleari
damnis affecta displosio Saturni die facta est: ergo iusserunt
auctoritates vaporem materia radioactiva contaminatum in aërem
disperdi, ne graviora incommoda evenirent, ideoque omnes incolas
intra XX chiliometra domos suas deserere. Timor diffunditur
calamitatis atomicae post terrae et aequoris vim.
Scripsit
Herimannus Novocomensis - 13/03/2011 00h19
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
