|
|
|
NUNTII 
De Liguriae calamitatibus
 De Liguriae calamitatibus
Decimo die postquam mons luteus procubuit in
territorium “Quinque Terrarum” sub finem regionis
Liguriae sitae in parte Italiae spectantis inter Septemtriones et
occasum solis, amoenitatem locorum ex pulcherrimis totius orbis
vastans, nonnullis mortuis, eadem calamitas eademque in regione
urbem Genuam hesterno die attigit. Ingens copia luti et aquae
magnam urbis partem volvit. Sub vespero iam qui interierant
numerabantur: quattuor feminae et duae puellae. Tot viae mersae
sunt, capsae purgamentorum erraverunt fluitantes, plurimae
autoraedae ablatae sunt, acervis ruderum confectis, sed
etiam homines feminaeque flumine lutulento rapti sunt. Hodie
cives operam dant ut lutum auferant. Scholae clausae sunt,
vehicula non possunt duci. Quae causa est eluvionis? Extra ripas
tres rivi diffluxerunt. Interea periti meteorologici novam
pluviam provident et timor est ne nova inundatio fiat, etiam
aliis locis Ligustinis ac Pedemontanis.
Poteratne quod accidit vitari? Post
calamitatem rei requiri solent. Iam abhinc aliquot dies post
calamitatem Quinque Terras evertentem, locos amoenos praecipuos
qui Patrimonium Universae Humanitatis edicti sunt, geologi , ut
solent, neglegentiam territorii reprehenderunt: fluminum alveos
constanter purgandos esse nec minuendos nec tegendos ut viae
supra exstruantur vel aedes. Quae incuria et contemptio adversum
soli naturam labes et ruinas gignunt.
Nuntii recentissimi referunt adhuc in
Liguria pluere; in provincia Genuensi maxima vigilantia ad
vitanda pericula declarata est.
Scripsit
Lydia Ariminensis - 05/11/2011 22h43
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
