|
|
|
SCIENTIAE
De vita artificiosa creata
 De vita artificiosa
Vitae
studiosi Americani, a magistro Craige Venter ducti, primam
cellulam vivam artificioso DeNA (id est acido desoxyribonucleico)
gubernatam perfecerunt: hoc narratur in actis scientificis
"Scientia" (Science), studiosos bacterii
cuiusdam DeNAm exstruxisse et in cellulam hospitalem inseruisse,
unde microbius omnino ceteris eiusdem speciei similis creatus est
(quos ambos in imagine adposita conspicis). Indagatores
sperant ea ratione bacteria talia confici posse, quae medicamenta
aliaque chemicalia efferant. Magister Craix experimentum cum novo
programmate in cellula exstructo comparavit, nam bacterii
pristini genoma diligentissime descriptum, postea artificiose
restitutum est. Cellula nova multoties multiplicata est, usque ad
plurimos geminarum miliones: "Primum - inquit Craix - DeNA
artificiosus vitam cellulae gubernavit." Manipulus
studiosorum iam diu cum officinis medicamentorum fabricantibus
operam communem dat, ad bacteria pharmacis efferendis acta
perficienda; de eadem re cum societatibus petroliferis agitur.
Quamquam
exitus a plerisque lapis miliarius existimetur, sunt qui pericula
in experimento latentia praevideant: Helena Wallace, studiosa
Britannica, "Si novae creaturae in rerum naturam diffusae
erunt, nocumenta potiusquam beneficia exspectanda sunt: ignoramus
enim quomodo istae species ubiubi se gerant." Sunt etiam qui
timeant usum bellicum aut scelestum vitae artificiosae.
Scripsit Herimannus Novocomensis - 23/05/2010 21h40
.
.
|
|
BREVES
Turcia. Relatores Turci XXII annorum poena damnati ob involucrum diurnarii, quod "ad seditionem excitavit". - 22/05/2017 23h42
Inter 160 et 200 bellatores Curdici mortui sunt die Iovis ob ictus aeroplanorum Turcicorum in boreali parte Syriae – nuntiaverunt duces exercitus Turcici. Bellatores autem Curdici maximi socii sunt US-Americanorum contra Califatum Islamicum pugnantium. - 20/10/2016 13h34
Shimon Peres, princeps Israelianus, qui anno MCMXCIV Praemio Nobeliano pro pace exornatus fuit, agens nonagesimum quartum annum aetatis obiit. - 03/10/2016 18h31
VIDE ETIAM
|
