|
|
|
SCIENTIAE
Il Cern cattura l'
 Anti-materia capta est
Primum anti-atomi postquam creatae statim non evanuerunt
In capsula reclusa, anti-materiae fragmenta tam insolita sunt
quam vivus alienigena: in opificio scientifico Genevano CERN
physici atomos anti-hydrogenii creaverunt et secluserunt antequam
in energeticam nebulam evanescerent. Anti-materia perraro in
rerum natura comperitur: cuius proton negativum, electron
positivum onus electricum ferentes quotiescumque cum materia
nobis nota conflixerint energia promanata invicem in nihilum
redduntur, quam ob rem anti-materia adhuc in opificiis CERN
creata post pauca millisecunda evanuerat, nam capsula ipsa ex
materia est.
Novo experimento Alpha appellato ex millenis simul genitis
duodequadraginta atomi anti-hydrogenii seclusae sunt, postquam
prope gradum nullum Kelvinianum refrigeratae (id est CCLXXII
gradibus Celsianis negativis) et campo magnetico in media capsula
pulsae erant, ne parietes attingerent: ita per secundi sextam
partem superfuerunt, quod studiosis ad novas res comperiendas
sufficit. Experimentum in actis "Natura" (Nature)
narratur.
De hoc primum se interrogant studiosi, cur materia in universo
abundet, anti-materia fere absit: si ambae pari pondere
adfuissent tempore Immanis Eruptionis (Big Bang), mundus
brevissimo tantum tempore ut energiae subita diruptio fuisset.
Gotifredus Hangst experientium dux "Nemo novit - inquit -
cur in rerum natura anti-materia fere absit; collaetamur quod in
machinis nostris nonnullas anti-atomos comprehenderimus. Prompti
sumus ad anti-materiae demum attactae secreta carpenda." Si
enim quibus rebus hydrogenium ab anti-hydrogenio differat
indagaverint, physici naturae speculi "vitia"
intelligere poterunt, unde explicetur cur tantum materia
anti-materiae praestet.
Anti-materiam esse anno MCMXXXI Paulus Dirac adfirmavit. Novem
atomi anti-hydrogenii primum Genevae creatae sunt anno MCMXCV;
post annum bismillesimum instrumenta technologica talia exstructa
sunt, ut in nosocomiis morbi aliquot Positronibus (id est
electronibus positivis) Emissis Tomographia (PET)
investigentur.
Scripsit Herimannus Novocomensis - 21/11/2010 17h56
.
.
|
|
BREVES
Turcia. Relatores Turci XXII annorum poena damnati ob involucrum diurnarii, quod "ad seditionem excitavit". - 22/05/2017 23h42
Inter 160 et 200 bellatores Curdici mortui sunt die Iovis ob ictus aeroplanorum Turcicorum in boreali parte Syriae – nuntiaverunt duces exercitus Turcici. Bellatores autem Curdici maximi socii sunt US-Americanorum contra Califatum Islamicum pugnantium. - 20/10/2016 13h34
Shimon Peres, princeps Israelianus, qui anno MCMXCIV Praemio Nobeliano pro pace exornatus fuit, agens nonagesimum quartum annum aetatis obiit. - 03/10/2016 18h31
VIDE ETIAM
|
