ARS VIVENDI
De plata Romaniola
 De plata
Romaniola
Antiquitus videtur extitisse ille panis
azymus qui in Romania, regione Italica quae vergit inter
Septemtrionem et Orientem Solem, vocatur “piada”,
Latine dicitur plata, sed ex voce Graeca, ut Ioannes Pascoli
putavit. Sic enim ille clarissimus poeta hoc verbum convertit,
cum suum poëmatium Italicum de hac re scriptum, vellet
explanare. Apparet platam esse antiquissimam: “panem…primo
cinis calidus et fervens testa percoxit, deinde furni paulatim
referti” (Sen. Ep. mor. 90, 24). Etiam hodie plata coquitur
super testam, id est Italice “testo”, quae vox Latina
videtur esse. Vergilius quoque profert:
"Instituuntque dapes et adorea liba
per herbam
subiciunt epulis (sic Iuppiter ille
monebat)
et cereale solum pomis agrestibus
augent.
...Exiguam in cererem penuria adegit
edendi
et violare manu malisque audacibus orbem
fatalis
crusti patulis nec parcere quadris.
Heus! Etiam
mensas consumimus…" (Verg. Aen. VII,v. 109 et
seq.)
Ex quo colligi
potest Romanos usos esse his adoreis libis ut mensis in quibus
dapes ponebantur: post cibos etiam mensae edebantur.
Etiam hodie sic
plata consumitur: cum rusticis lactucis, cum herbis coctis, cum
caseo molli, cum perna et tomacina. Cibus exquisitissimus est.
Cum forma orbis sit subtilisque, dividitur per quadras, (Verg.
ibid. v.114); sic in Verg. Moretum,48; Sen. Ben. IV, 29, 2.
Similiter in lingua Romaniola quadrae vocantur “quadrett”.
Quae necessaria
sunt ad platam perficiendam
Farina pura frumenti, non subtilissima:
quingenta grammata; adeps suillae vel oleum: ducenta grammata;
sal; aqua calida, (vel lac) quantum sufficit.
Praeceptum culinarium
Pone farinam super tabulam; in media farina
solve sal, adipem suillae vel oleum, aqua calida vel lacte; diu
subige manibus mixturam ut fiat sphaera mollis ac levis; fac
requiescere paululum pasta subacta. Demum divide in particulas ut
pugnos: quarum quemque fistula comprime donec habeas demum formam
rotundam quae coquenda est supra testam fervidam (fictilem vel
ferream).
Scripsit Lydia Ariminensis
|
