|
|
|
CINEMATA
Do Smurfs provide a model for a good society?
 Strumphi
His
diebus commemoratur centesimus dies natalis Petri Culliford, cui
aliud nomen Peyo fuit, inventor pumilionum caeruleorum quos pueri
et puellae ab anno MCMLVIII diligere non desinunt: quos Angli
"smurfs", Hispani "pitufos", Itali
"puffi" vocant, ego vero Latine "strumphos"
appellare constitui ex verbo ab ipso auctore creato. Petrus enim
Culliford, olim in caupona cum amico quodam cenam sumens, salem
sibi porrigi cupiebat; cum id verbum eum ad tempus effugeret, ex
conviva "schtroumpf" petiit; ambo illo vespere
quidlibet "schtroumpf" appellare perrexerunt, fabulae
nubeculatae futurae iocum constantem ex nihilo exstruentes. Paulo
post Peyo, peritus delineator, homunculos caerulos creavit et in
fabula picta introduxit. Nulla fuit ab initio feminina persona,
nam in catholica Belgica sexuum commixtio plerisque invisa illo
tempore fuit. Postea creata est singula "strumpha"
flava coma, allicientibus oculis.
Strumphi
in fungis silvestribus vivunt sub firma dicione Maximi Strumphi,
rubro pileo distincti; sua quisque facultate nosci potest: est
habilis, sapiens, tonsor, iratus, comis ... sed abest pecunia.
Anno MCMLXXXI Hanna-Barbera imagines animatas diffundere coepit,
toto in orbe pueris et puellis gratas.
Scripsit Herimannus Novocomensis
|
|
|
