|
|
|
HISTORIA
Andreas Vesalius
 Andreas
Vesalius
Abhinc quingentos annos, i. e. die 31 Dec.
anni 1514, Bruxellis natus est Andreas Vesalius, qui magnam
excelsamque gloriam adeptus est vel non longiore vitae spatio.
Nam dum e Palaestina redit in Europam, navis, qua vehebatur,
horrido turbine adeo iactata est, ut ad Zacynthi insulam sit
compulsa ibique Andreas, absumptis viribus, die 15 Oct. a. 1564
extremum efflaverit spiritum. Primo studiorum curriculo
universitario Lovanii expleto, Lutetiam Parisiorum se contulit
Vesalius, et in huius urbis universitate eximios medicinae
magistros audivit et artem secandorum cadaverum didicit
praesertim a Guinthero Andernaco, cuius cooperator fuit
in opere conficiendo, quod 'Institutionum anatomicarum
secundum Galenum libri quattuor'
inscribitur. Bello Carolum V imperatorem inter et Franciscum
I Valois iterum conflato, Lovanium rediit Vesalius, ubi primum
librum suum edidit c. t. 'Paraphrasis in nonum librum Rhazae,
medici Arabis clarissimi' . Insequenti anno 1537
Patavium ivit, cuius urbis universitas tunc alias omnes
praecellebat. Eodem anno est medicinae laurea honestatus et
statim, cum iam Hebraicam, Graecam, Latinam linguam calleret, hac
facillime usus anatomiam docere coepit. Tunc omnibus in
universitatibus medicina docebatur secundum Galeni praecepta,
medici sane eximii, cuius tamen doctrina anatomica validis
fundamentis carebat, propterea quod de humano corpore Galenus
scripserat putans fere nullum discrimen esse inter homines et
animalia. Atque per saecula istud praeiudicium viguit, dum pauci
medici sicut Berengarius Carpensis ineunte saeculo XVI corpora
mortuorum secanda, quo melius anatomia intellegaretur,
adserebant. In rebus anatomicis describendis Vesalius
ratione usus est vere scientifica; omnes igitur humani
corporis partes, quae vel ignorabantur vel male antea
explanatae erant, opere gravissimo c. t. 'De humani
corporis fabrica libri septem' clare describuntur et
varii earum nexus explicantur. Quod opus anno 1543
Basileae editum est, eodem scilicet anno cum Norimbergae in lucem
prodiit Nicolai Copernici tractatus astronomicus 'De
revolutionibus orbium caelestium' inscriptus.  Vesalii opus interretialiter legi potest:
<http://www.e-rara.ch/bau_1/content/pageview/6299038> sive: <http://tinyurl.com/n2pnasn> Sed postquam
'Fabrica' edita est, eius auctorem nonnulli medici acriter
improbarunt, quoniam is Galeni auctoritatem saltem in rebus
anatomicis non iam sequendam esse adfirmare ausus erat.
Icobus Sylvius (Jacques Du Bois)- ut exemplum adferam- in
libro quodam ad Galenum defendendum composito scripsit huius
medici doctrinam inepte neglectam esse a "Vesano
quodam"; adeo stulte plerique medici scripta
Galenica venerari solebant. Sed anatomia
a Vesalio descripta tandem vicit et omnibus fere in
universitatibus opus illud pedetemptim legi coeptum
est. 'Fabricae' altera editio anno 1555 impressa est.
Memoratu digna sunt etiam scripta Vesaliana haec: 'Epistola
rationem modumque propinandi radicis Chynae decocti pertractans'
(a. 1546, Basileae), et 'Anatomicarum Gabrielis Falloppii
observationum examen' (a. 1564, Venetiis). Eodem anno
1543 Vesalius medicus factus est Caroli Quinti et munus
chirurgi explevit ex. gr. curando, sed frustra, Henricum II
Valois, qui equestri certamine graviter vulneratus erat. Cur iter
in Palaestinam susceperit Andreas, varie disputatum
est; sunt qui credant eum spiritali necessitate
impulsum fuisse, ut scelus quoddam eo itinere expiaret, quia
corpus hominis cuiusdam adhuc viventis imprudentissime secuerit
(fons: Adalberti Pazzini 'Historia artis medicae', vol.
I, p. 754; 'Minerva medica', Romae, a. 1974).
(Die 31 Dec. 2014
hanc commentatiunculam scripsit Victorius Ciarrocchi, Italus
Pisaurensis).
Scripsit Victorius Ciarrocchi Italus Pisaurensis
|
|
|
