Hammaburgo ex urbe - Gordonus Brown gubernationis praepositus hodie a BBC statione radiotelevisificâ interrogatus dixit legatos Britannos studere „rem explanare, ut illa possit e custodiâ dimittere." Legatos collocutos esse cum mulieris arrestatae familiaribus. Gordonus stationis diurnariis dixit mulierem vehementer dolere, quod factum esset.

Interea Londinensis locutor ambasciatoris Sudaniani declaravit se nondum potuisse colloqui cum indagatoribus astynomicis, sed scire solito modo procedendi magistratûs inquirere in mulierem suspiciosam. Idem locutor, cuius nomen est Khalid al-Mubarak, a stationis BBC diurnario interrogatus: "Cultûs civiles (sc. Sudaniae et Britanniae)" inquit „inter se valdê differunt, hoc multum valet." Sed se putare hunc eventum effectum esse querelis parentium indignatorum. "Reverâ" Khalidus inquit „haec res est fluctus in simpulo".

At quid est factum? Plerique discipuli elementarii optaverant, ut ursulo cuidam lusorio, qui erat suus felicio*, nomen imponeretur "Mohammed". Itaque Gilliana Gibbons in Anglicâ scholâ privatâ „Unity High School", quae sita est Khartumâ in urbe, ubi praedominatur fides islamica, instituit parvam caerimoniam, in qua bestia textilis baptizata est nomine Mohameti.

Ephemeris Britannica, c.t. est „The Guardian", refert parentes discipulorum sexennium, magnam partem operarii technici et olearii, dici, cum hanc rem accepissent, indignati querelam habuisse apud ministerium eruditionis. Deinde paedagoga 54 annos nata est comprehensa. Eidem imminent 40 verbera et poena custodiaria maximum sex mensium. Magistrae obicitur, quod laeserit honorem prophetae et fundatoris religionis islamicae.

Diurnarii mediorum referunt religiosos fanaticos ante custodiam publicam saevire ultionem minati. Collegae Gillianae coniciunt huic casui subesse insidias. Qui narraverunt diurnario ipsius „Times Online" a parentibus nullas habitas esse querelas. Rem potius effectam esse ab aliquo collegâ indignato.

Gilliana Gibbons m.Iul. Liverpoolio emigraverat in Sudaniam. Eadem voluit novum initium facere, cum post 33 annos connubii divortium fecisset cum marito, voluit cognoscere cultum civilem sibi novum inque eodem vivere. Vir quidam propinquus, qui habitat in Aighburth, vico suburbii Liverpooliani, ubi Gilliana vixerat, a „Times Online" interrogatus: "Gilliana" inquit „consilium ceperat, ut in Africâ viveret per duos annos". Gillianae familia amicique referuntur valdê sollicitari de eius salute. Petrus vir eius quondam maritus, ipse director scholae, necnon Iohannes et Iessica, eorum filius 25 et filia 27 annos nati, noluerunt publicê de hôc casu loqui.

Robertus Boelos, director scholae Britannicae Khartumiensis, a „Times Online" interrogatus dixit astyphylaces verum impetum fecisse in loca scholae, ubi etiam magistri habitarent. Idem: „Istaec" inquit „est interpretatio omnino falsa. Dominula Gibbons numquam voluit laedere islamum".

Puellam septennem ursulum lusorium mense Septembri secum attulisse in scholam. Eundem celeriter factum esse felicionem classiarium omnique fine septimanae aliâ perâ scholari domum ablatum esse. Pueros puellasque sedulê diario inscripsissent, quae ursulus domi expertus esset. Idem diarium nunc ab astynomis est confiscatus, parva eiusdem possestrix interrogata.

Schola autem usque ad mensem Ianuarium exeuntem est clausa - quia timentur impetûs fanaticorum.

__________________

Nairobiâ ex urbe - SUNA agentura nuntiorum Sudaniana nuntiavit paedagogam 54 annos natam hodie accusatam esse instigationis populi et despectûs publici rerum religiosarum. Britannum ministerium rerum externarum statim respondit.

Locutor gubernationis: "Nos" inquit „hac re sumus stupefacti et spe decepti. David Miliband minister rerum externarum ideo arcessivisse ministrum rerum externarum Sudanianum, „ut cum eodem pergeret hanc rem discutere".

Gilliana Gibbons die Dominico comprehensa erat, cum parentes dicti essent querelas habere de felicione classiario, ursulo, cuius nomen esset Mohametus.

Iudices huius terrae, in qua religio islamica est publica et nationalis, contendunt nomine bestiae lusoriae serico sublaneo confectae laedi dignitatem prophetae. Nuperrimê autem discipulus septem annos natus nomine Mohameti dixerat se optasse, ut ursulo lusorio imponeretur nomen suum. Mohametus a diurnariis Khartumâ in urbe Sudaniae principali interrogatus: „Magistra" inquit „ex me quaesivit, quale nomen ursulo imponere vellem. Dixi Mohametum. Ursulum appellavi nomine meo".

Puer magistram defendens affirmavit illam cum discipulis numquam locutam esse de religione. Usque nunc dictum erat plerosque discipulos elementarios optasse nomen Mohameti ad felicionem classiarium denominandum. Itaque Gillianam Gibbons in oeco classiario privatae scholae Anglicae nomine Unity High School, in urbe Khartumâ sitae, ubi islamum praedominatur, instituisse parvam caerimoniam, in qua bestia textilis baptismate acciperet nomen prophetae.

Hoc cum accepissent parentes discipulorum, dicuntur querelam habuisse apud ministerium eruditionis. Deinde paedagoga est comprehensa. Cui nunc imminent quadraginta verbera et custodia sex maximum mensium. Schola autem est clausa - quia timentur impetûs fanaticorum.

Nairobiâ ex urbe - Gilliana Gibbons iudicio Sudaniano condemnata est, quod instigavisset ad odium religionis. Gilliana ab uno ex eius patronis dicitur per 15 tantum dies in custodiâ retentum iri. Idem iurisconsultus rettulit deinde eandem e Sudaniâ iussum iri e terra abire. Secundum ius Sudanianum haec mulier 54 annos nata potuerat puniri 40 verberibus necnon custodiâ sex mensium et multâ pecuniariâ.

Gilliana Gibbons comprehensa erat die Dominico, cum dicti essent parentes discipulorum querelam habuisse de Mohameto felicione classiario. Et legati Britanni et Sudaniani ex illo tempore studuerunt casum mitigare.

Usque nunc dicti erant plerique discipuli exoptasse nomen Mohameti ursulo ludorio imponendum. Itaque Gilliana Gibbons in oeco classiario Anglicae scholae privatae „Unity High School", quae sita est Khartumâ in urbe, ubi praedominatur fides islamica, parvam caerimoniam instituit, in qua bestia textilis nomen acciperet prophetae.

Parentes discipulorum cum hoc accepissent, dicuntur querelam habuisse apud ministerium eruditionis. Deinde paedagoga 54 annos nata est comprehensa. Eidem obicitur, quod laeserit honor islamici fundatoris religionis et prophetae. Schola autem clausa est - quia timentur impetûs fanaticorum.

Khartumâ ex urbe - Manifestatores Khartumâ in urbe Sudaniae principali hodie congregati sunt ante palatium praesidentis clamantes: "Infamia sit Magnae Britanniae! et „Istam necate, necate!" et "Ne quae sit tolerantia: fiat supplicium!" Ein Heri magistra a iudicio damnata erat custodiae 15 dierum, quia in eius institutione scholari ursulus lusorius dictus erat appellatus esse secundum prophetam Mohametum. Deinde eandem iussam iri esse e Sudaniâ abire.

Observatores censent decem milia maximum homines manifestationis post preces Diei Veneris factas participes fuisse. Nonnulli secum ferebant fustes et cultros et secures, sed nulla tela automatica - quod est indicio hanc manifestationem non esse a gubernatione directam.

Inter precationes sacerdos in meschitâ urbis maximâ magistram acriter vituperaverat. Idem clericus, qui est severitate famosus: „Eo" inquit „quod istaec domina arrestatur, non expletur sitis nostrorum muslimorum Sudanensium. Sed gaudemus quod eadem arrestatur et ex terrâ fugetur." Gillianam Gibbons esse mulierem arrogantem, quae docuisset odium Mohameti.

Gubernatio Britannica studet discrimen superare ratione diplomaticâ. Locutrix Gordoni Brown ministri primarii declaravit eundem cum quodam homine magistrae familiari collocutum affirmavisse se rem valdê dolere. David Miliband minister rerum externarum iam heri vespere ambasciatorem Sudanianum arcessitum certiorem fecerat gubernationem Londinensem spe deceptam esse, quod Gilliana Gibbons damnata esset. Muslimi autem Britanni vituperaverunt, quod in magistram esset animadversum. Muhammad Abdul Bari, secretarius generalis Consilii Muslimorum Britannorum, magistratibus Sudaniae obiecit eosdem modum excessisse.

____________

==============

=============