|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
POLITICA
Terram maiorum numquam deseram!
Muammar al Gaddafi denuo negavit a negotiis publicis se remoturum. In oratione heri in urbe Az-Zawiya habita, quae per megaphona a compluribus milibus hominum audita est, Gaddafi dixit ridiculum esse, si quis se hortaretur, ut Libyam relinqueret. “Numquam terram maiorum meorum”, inquit, ”relinquam populumque mihi se devoventem.” Immo se ipsum esse paratum, ut pro populo suo se devoveret, Gaddafi dixit, qui ex quinque fere mensibus seditioni repugnat. Legati earum civitatum, quae de Libya futura deliberant, cum pridie Constantinopolim convenissent, denuo poposcerunt, ut Gaddafi munere se abdicaret. “Consilium nationale” a seditiosis ad tempus creatum ab illis civitatibus agnoscebatur, quasi potestatem haberet Libyam regendi. Gaddafi in oratione sua seditiosos „rattos“ appellavit, qui incolas urbium Bengasi ac Misrata veluti obsides retinerent iisque veluti scutis humanis abuterentur. Bengasi, urbs in Libya orientali sita, caput seditiosorum est; etiam Misrata, quae a Tripoli CC fere chiliometra abest, a seditiosis tenetur. Tyrannus Libycus pollicitus est V milliones Libyorum armatorum iussu dato ituros urbesque occupatas liberaturos. Iam Iovis die Gaddafi sectatores suos erat hortatus, ut seditiosos in urbe Bengasi versantes peterent. Misrata iam a copiis eius est circumdata. Scripsit Volfgangus Austriacus - 17/07/2011 23h18 . .
|
BREVES
Novissima demoscopia monstrant candidatam Democratarum ad munus praesidis USA Hilariam Clinton superare sui aemulum Republicanum Donald Trump 2-5%. - 05/11/2016 23h59
In Ungaria plebis scitum de migrantibus numerum legitimum suffragiorum non tulit, sed Minister Primarius Victorius Orban Cartam Constitutivam mutatum iri nuntiavit ne migrantes acciperentur non probante senatu. - 03/10/2016 18h35 Bratislaviae Slovacorum conveniunt duces 27 terrarum sociarum Unionis Europaeae - primum sine Britannia. Candidatus republicanorum ad munus praesidis USA Donald Trump superat in indagatione opinionum aemulatricem democratam Hilariam Clinton in tribus "civitatibus maximi momenti": Ohio (praestantia 5%), Florida (3%), Nevada (2%). - 15/09/2016 10h18
VIDE ETIAM
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
