Annus
2 0 0 4

DE PUGNA STALINGRADENSI.
Scripsit Johannes Gluszak

Pugna Stalingradensis Anno 1943 ineunte exercitus Theodiscus maximam cladem accepit in Russia ad ripam amnis Rha sive nunc Volga vocati . Die 19. m. Nov. 1942 inchoavit Russorum impetus , qui post tres menses obsidione acerrima delevit optimum exercitum Theodiscum . Excidium universum inauditum sortes totius belli anno 1939 incepti maxima ex parte diiudicavit , nam superbiam ac potentiam Germaniae fregit et postea populo Theodisco servitutem Russicam imposuit et ipsorum terram in oriente abstulit incolis funditus expulsis .
Exeunte anno 1941 fulmineo impetu tot exercitibus Russorum eversis ( praecipue duabus pugnis illustribus circum Kieviam ac ad arcum Briansk - Viasmam , ubi plus quam millionem ducenta milia captivorum captati sunt ) magna parte terrarum Unionis Sovieticae occupata usque ad suburbia Moscovae , principalis ubris , pervenerunt Theodisci . Credebant iam tot copiis hostium profligatis viam apertam esse Moscovam bellumque iam finitum . 'Procella' sive 'Taifun' assultus ultimus nuncupatus est et iam parata multa ad ipsum Hitlerum Moscoviae excipiendum . Sed frustra . Nam Russi limitibus extermis Asiaticis denudatis - nulli tunc fere armati vigilabant per extremum orientem Sovieticum - novos exercitus admoverunt . Illi adhuc nullis cladibus onerati ac pace per orientem refecti Theodiscos tot proeliis defatigatos nec paratos ad novam pugnam subito adgressi sunt . Mox victores fugati , belli iam confecti spe repleti imamanitatem cladis et vigorem et ferocitatem novi militis Siberici viderunt . A Moscova repulsi inordinate se recipiebant .
Ita hieme seviente nec Moscovam capere nec bellum conficere nec vires Russorum minuere potuerunt .
Hitler caede suorum iratus duces criminatus est cladis et ipse omnia belli consilia assumpsit nullo contradicere audente ducibus audacibus ac strenuis demotis dignitate . Vi receptum inordinatum cohibuit ac lineam belli iterum stabilivit .
Vere incepto et victoria Moscoviensi firmatus Stalinus urbem Charkov per meridiem Scythiae adgredi constituit . Id contra concilium ducum suorum - precipue Georgii , filii Constantini , Zhucov fieri iussit atque errorem mox clades pessima secuta est . Maior pars suorum iterum captivitatem aut mortem inierunt . Sed hoc exemplo tristi admonitus consilia
suorum ducum accuratius audire incepit et menda obstinationis animi causa admissa fugere .
Milites GermaniContra autem Hitler ; ille semper fortuna sua fisus magnas copias parari iussit et bellum per meridiem conficere , ut relicta Scythia et Caucasus mons petroleoferique campi ad mare Caspium positi captivaretur . Sed magna parans maiora neglexit nec parvis satis animum intendit . Nam spatiis tantis occupandis vires haud suppetebant . Nec unum , sed duo discrepantia destinata simul expugnari iussit . Nam uno ictu tum genu amnis Rha cum et remotissima litora petroleifera Maris Caspii occupare cupiebat . At iam impetu facto nec his destinatis habitis somniavit porro de sequenti bello per Indiam Bactriamque et cauta consilia adiutorum moderantiam suadentium spernere solebat .

Est urbs nunc Volgogradum , tunc Stalingradum atque antea Tzaritzin , vocatum ad ripam fluminis Rha , amnis ingentissimi ac incluti , posita . Hic et portus fluvialis et ergasteria multa erant , praecipue ea , quae fabricabantur currus arvenses sive Russice 'tractores' , ac belli tempore currus loricatos et arma diversa . Huc et frumentum et petroleum et metalla et alia bellica portabantur . Nunc hanc urbem constituit Hitler quanti quanti expugnare .
Iulio mense exeunte Charkovia capta itieribus maximis exercitus Theodiscus usque ad montem Caucasum petebat . Russi male pugnabant , pugnas maiores evitabant , exterriti et fortunae militaris suae incerti et ab indigenis , praecipue Cosacis -Russi hi erant - et Asiaticarum nationum rebellionibus in periculo se versantes . Praecipue Tsetseni - gens efferatissima - necnon Calmuci -natio Buddhicam religionem profitens - Theodiscum militem laetanter excipiebant .
Generalmajor Fridericus PaulusSed his in meridie prosperis nova destinata et iussa Hitler per septentrionem concepit . Cupiebat enim simul et urbem Stalingradum capere et propter nomen exosum Stalini , quo urbs ornabatur et momentum militare . Negotium , ut perageretur , dedit exercitui suo optimo Sexto , qui iam et Varsoviam et Lutetiam expugnaverat et a duce optimo (Generalmajor) Friderico Paulo imperabatur . Exercitus ille ad tempus copiis firmatus est , quae a meridie detractae erant .
Sed ita infirmius bellum per meridiem factum est ac clades futura ad Rham eo gravior exire debuit .
Hac pugna perhibetur hostium numerus duobus millionibus militum , circa duobus milibus curruum loricatorum , viginti sex milibus tormentorum ac duobus milibus aeroplanorum stetisse . Per sex menses seviebat proelium , quod circa millionem aut millionem et duocenta milia homines delevit .
Iam die 23. m. Aug. ad Stalingradi arctoam ripam Rhae advenerunt Theodisci , die autem 14.m. Sept. et australem ripam necnon ferroviariam stationem , quae usque ad urbem Astrachan ad os Rhae ducit , vi ceperunt . In urbe ipsa exercitus Russicus sexagesimus secundus duce Tsuikov audacter ac desperanter impetum Theodiscorum ex aere et per tormenta maxima resistebat .Praefectus Tsuikov dux exercitus Russici sexagesimi secundi
Constantinus Semionov , illustris scriptor Sovieticus necnon libri auctor 'Nives ardentes' ita pinxit dies illos : "Ubique domus flammae devorabant ac noctu incendiorum innumerabilium aurorae fumosae repleverunt horizontem . Interdiu nocteque terra quassabatur tonitru tormentorum pyrobolorumque . Reliquiae aeroplanorum per plateas circumiectae eminebant ac aer strepitabat clamore tormentorum aeroplana caelo persequentium nec puncto ullo temopris ignis infernalis extenuabatur ."
Hac de causa Stalingradi saltem circa quadraginta milia incolarum perierunt necnon centum quinquaginta milia vulnerati sunt . Trecenta milia autem trans Rham transportati sunt et ita servati .
Nunc autem non per aperta et patentia , sed per occulta et vastata , ruderibus , latebris plena pugnandum erat Theodiscis nedum hoc modo bellum gerendi eruditis . Ubique insidiae, doli bellici , nidi igniflui , singuli iaculatores occultati , impedimenta et pericula innumerabilia ; nunc nulla auxilia ex aere nec tormentorum magnorum opes prodere poterant singulo militi . Iactura dehinc enormis et progressus exiguus , at atrocitas eo taetrior , nam nec captivi facti nec vulneratis parcebatur . Proelium circum ergasterium 'Ruber October' vocatumPraesertim crudeliter pro ergasterio 'Ruber October' vocato pugnatum est . Si partem domus expugnare potuit miles diem totum pugnans , id credebat victoriam maiorem esse , quamvis noctu crebrius amitteeret id , quod diu tanto sanguine suo ceperat . Mox humano hosti adiunctus est et crudelior foederatus naturalis . Frigor enim crescens membra rigefaciebat , morbos faucibus ac pulmonibus inferebat . Adaeque nives insolitae altissimaeque motum equorum , curruum ac hominum omnino impediverunt .
Sed usque ad mensem Novembrem pleraque pars Stalingradi capta est , Russis solum ad ripam Volgae resistentibus . Miles enim Theodiscus , quamvis numero inferior , etiam caelo obstante , aliquid cibo somnoque refectus et bene armatus semper Russicum excedebat virtute , peritia et vincebat proelio. Certe Russus miles pro patria certabat , sed amor erat ambiguus . Nam patriam tyrannus severrimus vi regebat et omnes pavore implevit et innocentium excidio oboedientiam imposuit . Stalinus enim atrocitate pari , nisi maiore , in suos ut in hostes seviebat . Theodisci hostes erant , at multis Russis Russi Staliniani peiores inimici visi sunt .
Ita ius vitae necisque penes commisarios politicos per Rubrum Exercitum valebat . Quemlibet militem semper ac sine iudice necare aut suspectos agminibus poenariis adici iubere fas illis erat . Talia agmina e.g. campos pyrobolis sepultis infestos pedibus propriis 'purificare' solebant .
Milite Theodisco Russicoque in Stalingrado decertatnte interea in lateribus Sexti Exercitus alia gerebantur . Nam hic loco periculis maximis exposito per septentrionem secundum Thanaim amnem et meridiem per deserta nivosa Dacoromani munita praesidia habuerunt . Miles tamen incertus , male armatus ac virtute militari necnon imperatoria raro clarus . Centurione amisso agmen relictum sponte porro certare non solebat . Erant casus , ubi fame oppressi Dacoromani in vicis visi sunt arma pro pane et temeto vendentes . Semper peius quam Theodiscus miles tractabatur . E.g. ex Dacoromania ad regionem Stalingradensem non sicut Theodisci per ferrovias , sed pedibus itinera fecerat .
Hi igitur longa et exigua latera exercitus Theodisci tuebantur . Perspixerunt rem et Russi et praecipue dux eorum insignis Georgius Zhukov necnon Vasilevskij in spem adducti sunt . Illi iam medio mense Spetembris consilium belli ceperunt , ut Cannas maiores iterarent contenderent .
Pugna StalingradensisE meridie enim et e spetentrione forcipis ingentis duos dentes in corpus Theodisci exercitus per vestem Dacoromanicam -ut ita dicam - transigere et ita corpus illud secare et gradatim lacerare constituerunt . Consilium 'Uranum' adpellaverunt . Iam die 9. m. Nov. voluerunt Dacoromanos adgredi , sed ob quandam inopiam militum et armorum procrastinatum est usque ad diem 19 . Nov .
Dies erat nebulosus , nive et frigore insignis . Hora media octava mane omnibus tormentis copiisque Dacoromani oppressi ac mox fugati sunt . Male pugnabat Dacoromanus ad bellum male paratus ac solus cum centuriones obiissent . In tergo militis Theodisci nunc Russi devenerunt et die 23 . obsidonem clauserunt in regione Kalats vocata .
Ita subito circa trecenta milia ( viginti duae legiones ac centum sexaginta alia agmina ) Theodiscorum , Dacoromanorumque hac immensissima indagine capti sunt . Inter Stalingradum et Russos coniunctos in tergo Sexti Exercitus intervallum circa septuaginta milia chilometrorum et obsidionis circumferentia 450 chilometris erant . Locus ille ab ipsis Theodiscis ' aheneum' ("Kessel") vocatur et bene describit sortes eorum , qui nunc 'coqui' ad mortem debuerunt hoc infernali aheneo .
His auditis Hitler iussit Stalingradum quanti quanti teneri nec passum terrae occupatae relinqui . Simul pollicitus est exercitus servare ac per aeroplana omnibus necessariis : petroleo, armis , vestibus , medicamentis , frumentoque
suppeditare . Hanc opinionem dicunt plerique Hermanum Goering illi suggessisse ac firmavisse . Sed sunt qui verisimilius coniiciunt obstinatione Hitleriana natam esse . Sunt Secundum Paulum - 'libertatem agendi' id est Stalingradi relinquendi et quaerendi salutem fracta obsidone frustra ac pluries petentem - exercitus in Stalingrado indigebat quotidie c. 750 tonnarum (sit venia verbo!) omnium rerum ad usum militum necessariarum . Forsan 500 tonnae satis fecissent . Haec et plura promisit Goering , sed vix 90 inferre obsessis potuit ! Nec numerus aeroplanorum , nec aeriportus apti aderant . Unus enim solo ex septem aeriportubus nocturnam facultatem velivolarum excipiendorum habuit . Et ceterum tunc coelum contra Theodiscos certabat , ut videbatur . Insolitae enim nives ac tempestates tunc omnia rigore et caecitate nivea adfecerunt . Id non semper fit hac in regione , ut docent nuntia de caeli statu per Stalingradum annis superioribus . Raro tanta frigora et nives coniungebantur ut anno 1942-1943 .
Ericus von MansteinSed febricose et legiones novae paratae sunt procul aheneo infernali , ut quam celerrime obsidio frangeretur et Sexti Exercitus fatiferum periculum redimeretur . Rei Ericus von Manstein - vir eximio ingenio ac virtute imperatoria praecipu praeditus - praeerat . Novus exercitus conditus - 'Thanais' vocatus - ob varia bellica incepta Russorum statim subsidio venire obsessis non valuit .
'Tempestas brumalis' impetus nuncupatus est et modo die 12 . men. Dec. inchoavit . E meridie usque ad 'aheneum' pervenire necesse esse decretum est . Quamvis vires et arma iterum deficerent ac hostes peracriter resisterent , forsan obsidione clausos liberavissent , nisi clades necopinata -iterum culpa foederatorum inducta - in cassum redegisset spem victoriae vel saltem salutis tot virorum in Stalingradensi Orco captos . Nam die 16. men. Dec. Russi Italos ac Hungaros , milites forsan nonnumquam haud ignavos et pavidos , at Russis impares et bellum alienum , non suum censentes , adgressi sunt et fugaverunt , ita timorem 'maioris Stalingradi' incutentes Theodiscis . Nunc enim non solum Sextum Exercitum , sed et omnes exercitus trans Rostovum Thanaicum dispositos capi delerique posse timor ortus est .
Insuper Tatsinscaia , aeriportus principalis Theodiscus , unde obsidione oppressi suppetebantur , hac clade amissa est . Itaque novis periculis additis veteribus impetus salutiferus in Stalingradum finitus atque ex Caucaso miles omnis revocatus est Stalingrado re vera destituto .
Generaloberst Hermannus HothHis ad nativitatis diem Stalingradi cognitis desperatio invasit in dies adventum ducis Hoth et suorum militum exspectantes , nam nunc nulla spes vitae servandae supererat , nisi si quis per aeroplanum graviter vulneratus evolari posset . Dehinc et mutilationum consulto sibi inlatarum numerus crevit , et volunariae mortis et desertionis casus , hactenus apud Theodiscos rarissima .
Aegerrime et corpus fames necnon animum inopia glandium et pulveris opprimebat . Ineunte mense Ianuario sine iussu centurionis tormentis ignem iacere in hostes non licuit ! Viros debiles et fame oppresos nunc morbi et vulnera magis magisque adficiebant .
Interdum Russi laeti victoria iam certa novos impetus parabant novis novisque agminibus legionibusque adductis . Die 10.01 . occidentalem partem 'ahenei' vi maxima ceperunt et aeriportum magni momenti Carpovca die 13 ; die autem 16 Pitomnic - hic erat ille solus aeriportus , ubi et noctu velivola excipi potuerunt . Mox solum Gumraci aeroplana consedere potuerunt relictis aeriportubus amissis . Ita in dies peritus Exercitus Sexti accelerebatur . Die 22 . aheneum Stalingradense dissectum est a Russis , die sequente et Gumraciensis aeriportus amissus .
Parietinae StalingradiPars meridionalis sive minus 'aheneum' meridionale , ubi erat Paulus usque ad diem 31. men. Ian. decertabat , arctoum longius obsidionem tulit : usque ad diem 2. m.Februarii denudati et exasperati se defendebant . Iam non agminibus , sed singulis militibus inordinate certatum est .
Exitu obsidionis adpropinquante nec vulenratis ullus cibus praebebatur nec medicamenta . Rebus ita stantibus dux Paulus honestatus est , quamquam insidiose , sceptro imperatorio , ne a Russis caperetur , sed mortem adsciret sibi voluntariam . Numquam enim per totas res gestas Theodiscas ullus imperator campestris captivus factus est .
Vocem insinuantem supremi ducis , at Sexti Exercitus perditoris ac proditoris , non exaudivit Paulus . Deditionem secundum leges belli fecit et a Russis - sicut omnes duces et plerique centuriones superiores - bene ac humaniter tractatus est .
Non ita - eheu - miles gregarius . Nec certus eorum captivorum numerus notus nec fata accurata . Omnes enim aegroti , emacerati , frigore mutilati , exsangues in captivitatem venerunt . Russi autem saepissime auxilium nullum aegrotis nec cibum famelicis dabant . Ita perierunt plerique iam pugna finita et vita quasi servata . Ex numero ducentorum quinquaginta milium militum Stalingradi obsessorum , anno 1956 vix sex milia domum redierunt . Aliquot milia vulneratorum evolati sunt ante ultimum aeriportum amissum .
Sed iactura Russorum incomparabiliter gravior erat . Urbs devastataCreduntur circa millionem hominum hoc proelio amisisse . Non solum ob virtutem militarem Theodiscorum , sed potius malitia et crudelitate suorum ducum et centurionum tantas victimas ortas esse .
Hactenus per campos Stalingradenses ossa ubique inveniuntur ac Stalingradi ornamenta et identificatoria(?) signa militum venduntur ab iuvenibus . Sine sportulis Theodiscis piis ossa colligere et sepelire tamen circum Stalingradum non licet . Nam multi sunt nunc sperantes Sexti Exercitus ossa quaestui fore . Licentiae et permissa documentaque multa igitur perimpensa .
Omnia vetera sepulcreta Theodisca deleta sunt , monumenta autem militi Sovietico dicata ubique conspicua . Id privilegium victoriae , cladis autem ius misericoridiam commovere erga nullis monumentisornatos proditosque , at usque ad finem digne ac peraudacter pugnantes .


Retro ad:

Novissima editio
Summum paginae