Annus
2 0 0 4

Comitia in Ucraina repetenda NUNTII HEBDOMADIS (21-27.11.2004):

COMITIA IN UCRAINA REPETENDA…
Comitia praesidi Ucrainensium eligendo repetenda sunt – decrevit die Saturni parlamentum terrae. Comitia modo peracta pauco numero suffragiorum vicit minister primarius hodiernus Victor Ianukovyts, fautor artiorum iunctionum Ucrainae cum Russia. Ad occidentem plus spectans Victor Iustsenko, candidatus factionum partis adversae, dixit Ianukovyts reum esse fraudis comitialis, nam in finibus orientalibus terrae, quorum cives maxime ei faveant, praesertim in provinciis urbium Lugansk et Donetsk, tam multa suffragia data esse, ut fere certum videri posse nonnulla eorum "e manica" in corbem infusa fuisse. Talium falsorum suffragiorum etiam milio cum dimidia fuisse a fautoribus Iustsenko timetur. Hanc ob rem totam iam per septimanam in mediae Kieviae foro Independentiae (Majdan Nezaleznosti) vigiliam tenent, effectum officialem comitiorum ut tolletur flagitantes. Quorum vigilantium copia interim et nonnulla centena milia hominum attingere putabatur. Moderatores octo provinciarum Ucrainae occidentalis necnon mediae statim fere effectum officialem reiecerunt, at sex earum, id est omnis regio Galiciae Lodomeriaeque (Halytsyna), praesidem novum Iustsenka pronuntiaverunt. Multi ictum vigilium publicorum nisi ipsorum militum ministro primario subiectorum in Kieviae vigilantes regionesque occidentales terrae faciendum timebant atque timent, adhuc tamen omnia pacifice pervenerunt, nonnullique tribuni militum se numquam contra populum pugnaturos pronuntiaverunt.


…AT IN IRAQUIA PROCRASTINANDA?
Quindecim factiones politicae Iraquiensium postulant ut comitia parlamentaria fine Ianuarii proximi habenda procrastinanda in dimidium anni 2005 sint. Inter quas factiones et greges maximi in hac terra momenti sunt, ambo scilicet factiones Kurdorum necnon Motus Democratarum Independentium, qui motus factio est musulmanorum fili sunnitici. Sunnitae enim timent ne multi eorum prohibeantur suffragia sua dare pugnis quae multis in regionibus ipsorum ab islamistis cum Americanis militibusque regiminis Iraquiae adhuc acriter aguntur. Econtra siitae, qui pars maior mahometarorum Iraquiae hodie sunt, volunt comitia die constituto, 30 scilicet Ianuarii, peragenda. Civitates Unitae Americae (USA) sociique earum (Angli, Itali, Poloni) in eo tendunt ut comitia quam celerrime habeantur, regimen tamen Iraquiense haesitare videtur. Ante paucos dies regimen clam factionem Baas pristini dictatoris Saddam Husain ad de pace negotiandum invitavit, quamquam factioni huic in comitia intrare sententiasque suas publice pronuntiare non licet. Invitatio tamen repudiata est.


VAE TIBI, MARGARINA!
Confirmatum scientifice est quod viri sapientes, contra praevalentem opinionem plebis, semper crediderunt: butyrum margarinum, id est ex oleo factum, multo plus salubritati nocere quam butyrum lacteum. Maxime voracissimeque enim margarinum neurones vexat. Ita saltem credit Anna-Carlotta Grandholm cui munus apud Universitatem Medicam Charlestoniae (Charleston) in civitate Carolinae Meridionalis est. Quae Grandholm naturam nocivam margarini adesse suspicare coepit cum processui margarinum fabricandi ipsa testis fuisset. Nam in hoc processu permulta artificialiter fabricatores adipiscuntur, e.g. oleum hydrogenio tractantes, deinde zincum cuprumque addentes, ut mixtura firmior fiat. At horum duorum metallorum maximae copiae immo in cerebrio hominum morbo Alzheimer laborantium inveniuntur! Reum nocivitatis margarini credit Grandholm pinguedonem generis, ut dicitur, trans, quod genus multis speciebus escae additur ut longius recens maneat.


E LUNA LUX
Helium, id est gasium quo atmosphaera lunae abundat, alimenta ignis sive combustibile novum terrae aderit postquam petroleum liquidum volatileque terrestre exhauretur – nuntiant participes seminarii internationalis lunae explorandae modo in India habiti. Iam 25 tonnae helii generis, ut dicitur, tertii (He-3) suppeditet, ut omni Americae Septentrionali per unum annum satis energiae adsit – docet unus participantium, Laurentius Taylor Americanus. Cui annutat A.P.J. Abdul Kalam Indus, dicens in luna sub specie helii tertii decies plus adsit energiae quam omnibus in combustibilibus fossilibus terrae. Nec sit - eorum sententia - tam magna difficultas gasium illud in terram vehi, nam compressum navibus pontoribus (Anglice space shuttle) paululum tantum hodiernis maioribus facile adduci possit.



Comitia in Ucraina repetenda BREVES:

Vino, quod in regione Helvetiae facitur, cui nomen idem est ut provinciae Francogallorum vinis spumantibus notae, id est Campania (Champagne), non plus licebit nomine vini Campaniensis nominari. Id effectum est conventionis inter Unionem Europaeam et Helvetiam anno 1998 contractae, qua Francogallis tantum nomine hoc uti liceret. Abhinc vinum Helvetorum nomine Libre-Champ vocabitur.

Habemus testimonia hominum qui testes aderant gasificationi in carceribus Coreae Septentrionalis inclusorum peractae – dicunt periti sedis Simonis Wiesenthal. Gasificationes haec annis 1970-2002 peractae sint. Gasificatio telis internecivis exercitui inveniendis peragi creditur.

Computatro Shuguang-4000A invento, quod undecim biliones actorum per secundam efficere possit, Sinae terium imperium mundi rerum computatralium – post USA scilicet et Iaponiam - a peritis nominatae sunt.

Septem familiae Cambodensium in silvis habitantes modo inventae sunt, quae per 25 ultimos annos ab aliis hominibus latentes manserunt, postquam anno 1979 ab occupatoribus Vietnamensibus fugam in montes fecerant. Ibi modo ferorum hominum vitam egerunt, credens Cambodiam adhuc a Vietnamensibus occupatam esse.

Delphini vitam quattuor Novozelandensium in mare natantium servaverunt, cum hi a pistrice anthropophaga aggressi sint. Eam circumnatantes aquamque vehementer claudis battuentes impediverunt pistricem homines adire. Ita comitati sunt natantes usque fere ad litus.

Iohanna Giese puella Americana primus homo est qui e contagione rabiei sanatus sit sine iniectione vaccini. A vespertilione in ecclesia quadam leniter morsa, Iohanna periculum nullum sibi imminuere censuit, ad medicum ergo, ut vulnus inspiceret, non venit. Uno demum mense postea, cum prope morti iam esse videbatur, in nosocomium advecta, Iohanna, in soporem psychotropicis inducta quattuorque medicaminibus novis tractata est, quorum opere virus rabiei quasi miraculose abigeretur.

Primum a tempore alteri belli mundani Britanni chartas identitatis habere secumque eas portare verisimiliter debebunt, nam ita vult regimen reginaque Anglorum, ut melius contra tromocratas mercatoresque psychotropicorum pugnare possint.

Al-Dzazira, statio televisifica panarabica, mox et Anglice nuntios divulgare incipiet. Ab Americanis Al-Dzazira multoties accusabatur ut tromocratis islamistis clam faveret. Per hanc stationiem omnes suos sermones latens Osama bin Laden divulgare solebat, iique aliis copiosius de sceleribus ab Americanis in Afghanistania Iraquiaque perpetratis loquuntur.


Retro ad:

Novissima editio
Summum paginae