Annus
2 0 0 4

Quattuor fere post annos factiones dexterae et mediae imperium in Dacoromania repetituros videntur – in comitiis regionalibus modo peractis maiorem partem suffragiorum collegerunt factio nationalo-liberalis (PNL) et democratica (PD)

NUNTII SEPTIMANAE (27 IUNII - 3 IULII 2004)

MARLON BRANDO E VITA DISCESSIT

Marlon Brando, histrio praeclarus Americanus, 81 annum agens e vita discessit. Primus histrionum Hollywoodensium Brando "humane" loqui coepit, sc. sine nimia verborum affectatione. Partes agit inter aliarum Stanlei illius Kowalski in pellicula "Tramen urbanum nomine Desiderium", domini Viti Corleone in "Patrino", necnon tribuni militum reclusi Kurtz in "Tempore apocalypsis".


Novus praeses Consilii Europaeani primarius minister Lusitaniae Jose Manuel Durao Barroso a moderatoribus civitatum regiminumque terrarum UE die 29 Iunii electus est, nam Romanus Prodi Italus, qui hoc munere quinque per ultimos annos fungebatur, Kalendis Novembris rude donandus est. Eodem conventu, quod Bruxellis Belgarum accidit, Hispanus Javier Solana denuo praeses rebus externis administrandis UE creatus est. Constitutione nova ab omnibus terris Unionis probata, Solana statim minister rerum externarum fiet, quod munus adhuc in UE defuit. Hoc tamen non ante annum 2007 accedet, aut – putant nonnulli - potius numquam, nam ut fiat, nonnullis in terris constitutio plebiscito accepta esse debet, inter quarum et Britania, cuius cives magna ex parte se contra constitutionem esse sentiunt.


Turcia in Unionem Europaeam admitti debet – dixit praeses Civitatum Unitarum Americae Georgius W. Bush in conventu societatis NATO Constantinopoli diebus 29-30 Iunii peracto. Terra haec – perrexit – mox omnes conditiones ut membrum UE fiat adipiscetur. In Unionem admisa Turcia, secundum Bush, iunctio optima esset inter Occidentem et mundum musulmanorum, paci inter hos et illos valde adiuvanda. Cum Turcia ut membrum sui Unio Europaea omnibus monstrare posset se nullo modo gregem clausum unius religionis esse – addidit moderator USA. Praeses Francogaliae tamen Hiacynthus Chirac uno die postea dixit Bush talia exprimere non debuisse, nam expansio UE non eius res esse.


Die 28 Iunii, duobus diebus antea quam expectabatur, Civitates Unitae Americae regendi potestatem regimini Irakiae tradiderunt, hac re officialiter occupationi huius terrae finem ponens. 138 tamen milia militum Americanorum una cum 23 milia sociorum in Irakia manebunt ut contra ictus bellatorum clandestinorum factionis BAAS necnon islamistarum populum Irakiensem protegant. Primarius minister temporalis Iiad Alawi nominatus est, isque moderatores societatis NATO Constantinopoli convenientes rogavit ut milites suos pacis tuendae causa NATO in Irakiam mitteret, ad quod tamen Francogalia statim se non assensuram pronuntiavit. 30 Iunii Saddam Husain, qui per ultimos decennios dictator Irakiae fuerat et perpetrator homicidiarum fuisse accusatus est, e carcere Americano regimini novo Irakiae traditus est, iudiciumque eius statim coepitur. Ego solus praeses Irakiae sum – dixit Hussain bellicose primo die litis. - Homicida autem est Georgius W. Bush. Proximo anno iuneunte suffragium in Irakia habendum est, quo senatus atque regimen longiturnum eligendi sint.


Primus minister Bohemiae Vladimirus Spidla se munere abdicavit, postquam factio eius, sc. socialistae (CSSD), cladem maximam in comitiis ad legatos parlamenti Europaei eligendos acceperat. Novus minister primus Stanislaus Gross a praeside Vaclao Klaus nominatus est, qui adhuc munere ministri rerum internarum fungebatur. Cui tamen perdifficile erit maiorem partem legatorum parlamenti Bohemici suae parti allicere. Fieri possit ut regimen, ut dicunt, minoritarius designet, tacite a Communistis Bohemiae et Moraviae (KPCM), qui vulgo "cerebro duro" laborare dicuntur, adiutum.


Praeses Lithuaniae altero in certamine comitiorum Valdas Adamkus electus est, quem numerus ciuium paulo maior (55,21% ad 47,79%) maluerat, quam Casimiram Prunskiene, Haec enim proximis coniunctionibus terrae suae cum Russia favet.
Adamkus, ab ordine communistarum Sovieticarum abhorrens, maximam partem vitae exsul in USA degebat. Annis 1998-2003 iam munere praesidis Lithuaniae fungebatur. Postea, in comitiis praesidialibus victus est a Rolando Paksas, qui tamen a parlamento ultimo mense Aprili e munere evocatus est, postquam repertum erat eum in aemulatione comitiorum pecunia a *mafia* Russica donata fructum fuisse.
Casimirae Prunskiene suffragia dederunt praecipue homines pauperiores necnon gentes non Lituani (Poloni, Russi, Rutheni Albi) in hac terra habitantes.


Item parvo numero electorum in altero certamine suffragiorum praesidialium in Serbia Boris Tadic, fautor accessionis ad Unionem Europaeam, vicit Tomislaum Nikolic, petitorem e parte *radicalium* (SRS), quae factio ut Serbia terras vicinas (Bosniam partesque Croatiae) in dicionem suam redigeret, saepenumero postulabat.


Relationibus diplomaticis denuo iunctae sunt USA cum Libia. 24 ante annos regimen Vasingthoniense relationes cum Tripoli rupit, praesidentem Libiae Muammar Kaddafi maecenatem tremocratarum esse pronuntiavit, inter alia et ictus contra aeronavem viatoriam Americanam, quae anno 1988 in oppidum Caledonicum Lockerby decidit, reum esse („canem rabidum" praeses tunc USA Ronaldus Reagan Kaddafi nominavit). Post ictum tamen tremocratarum Al-Qaedae contra urbes Novum Eboracum et Vasingthoniam mense Septembri 2001 peractum Kaddafi, ultionem Americanorum etiam contra Libiam timens, munus tremocratas adiuvandi deponere se pronuntiavit, damnumque familiis victimarum cladis Lockerbiensis compensavit.


Estonia, Lituania et Slovenia, hae tres inter octo terrarum postcommunisticarum, quae recens Unionis Europaeae membra factae sunt, moneta euro verisimiliter primae utentur. Post sermones qui inter ministros rerum fiscalium harum terrarum et praesidem Aerarii Supremi Europaei Iohannem-Claudium Trichet die 27 Iunii clam peracti erant, tres terrae in ordinem fiscalem Europaeum ERM-2, quo monetae eorum euroni ligarentur, admisi sunt. Iam anno 2007 ineunte corona, litus tolarusque de mercatu discedent, eurone solo regnante. Nummi aliorum, maiorum novorum UE membrorum, sicut Polonia, Bohemia et Hungaria, anno 2010 vel serius demum deponi poterunt.

29.06.2004. - Islandia. Olafur Ragnar Grimsson ter iam primarius minister Islandiae electus est. 85% suffragiorum colligit, quamvis factiones sinistrae, candidatus quarum anno 1996 Grimsson primum comitiorum victorem discedit, nunc in senatu partem adversam agunt.

28.06.2004. - Tibetia. Cibus, ut dicunt, celeris cauponarum societas Kentucky Fried Chicken (KFC), quae omnibus fere in terris carnem gallinaceam multis in generibus ciborum praebet, consilia in Tibetia cauponas suas condere deposuit, ne buddhistis, qui contra necem animalium se pronuntiant, in odio esset.

28.06.2004. - Certiores fimus quosdam homines (tres Turcos, unum Pakistanum, unum Americanum) mox a barbaris 'Alqaedae" societatis asseclis forsan trucidatum iri. (V. C.)

Nuntii ultimae septimanae a Stanislao Tekieli scripti sunt



Retro ad:

Novissima editio
Summum paginae