Annus
2 0 0 4

(thema Ephemeridis 6

Thema Hebdomadis (25 - 31.07.2004)

IALTA ANNI 2004

Accessio Unioni Europaeae et collaboratio cum foedere NATO non sunt plus nobis maximi momenti – dixit praeterito die Lunae praeses Ucrainae Leonidas Kutsma. Mutata etiam est ‘lex terrae defendendae’, inde talia destinata Ucrainensium detraherentur. Maximi momenti sint nunc, secundum Kutsma, Ucrainae coniunctiones cum Russia. Dictum hoc, liceat tempori aemulationis comitialis idoneum, omnino inopinatum omnibus videtur: quamquam UE plagas multas Kutsmae numquam pepercit, collaboratio cum NATOne, Americanis praesertim hortantibus, optime progredi videbatur (Sbigneus Brzeziński, pristinus consultor rerum ad securitatem spectantium praesidis USA, dixit recens Ucrainae solum per paucos annos exspectare fore ut membrum foederis fieret).

De mutatione foederis Kutsma nuntiavit tempore colloqui cum praeside Russiae Vladimiro Putin in oppido Taurinensi maritimo Ialta habito, ubi anno 1945 Europa Occidentalis in dicionem Unionis Sovieticae a moderatoribus USA et Magnae Britanniae tradita est. Putin maximo cum gaudio ‘donum’ a Kutsma datum accepit, dixitque speculatores terrarum occidentalium iam diu in eo instabant ut coniunctiones inter Ucrainam et Russiam rumperentur.

Re vera, ut in 1945 ita nunc terrae occidentales, quamquam non rei cuius reos eos Putin putet, quodammodo sunt culpandae: Unio Europaea non potuit planius regimen Kiioviense in eo certiorem facere ut Ucraina ipsa numquam Unioni accidere posset. De hac re talia scripsit Martinus Bosacki, commentator actorum diurnorum Polonorum "Gazeta Wyborcza": Saepenumero Bruxellis audivi: Putin solus finem perturbationi Ucrainensi adferre potest! Nimis quoque impudenter moderatores Europaei nuper digito Ucrainensis monstraverunt quem in comitiis praesidialibus proximo mense Novembri eligere deberent, quod apud quemque sapientium cogitationes de servitute incitaret et certe Victorem Iustsenko, nam ille candidatus fautor est coniunctionum cum Occidente artiorum, suffragiis multorum privavit. Nunc Iustsenko etiam pecuniam maximam Russorum contra se in aemulatione habebit, qua adiutus a Kutsma unctus candidatus Victor Ianukovyts certabit.


Retro ad:

Novissima editio
Summum paginae