Annus
2 0 0 4

Morte tandem raptus... HOMINES IN CONSPECTU

MORTE TANDEM RAPTUS...

Totiens contigit ei effugere morti!

Primum mense Octobri anni 1969, cum in urbe capitali Iordaniae, Philadelphiae Ionicae (Amman), epistulam pyrobolum continentem acceperat, qui pyrobolus tamen non statim erupit. Postea Octobri 1971, cum milites suos in collibus Golan pugnantes visitabat, in insidias incidit - tunc gubernator autoraedae eius necatus est. Tres collaboratores ei proximi vitam amiserunt ob incursionem Isrehelianorum, qui, helicoptero noctu clam advecti domum eius Beryti (Beirut) invaserunt, ipsum tamen invenire non potuerunt.

Curabat ipse de salute sui valde. Numquam - aiunt - duabus sequentibus noctibus eodem in lecto dormivit, semper cum manubalista parva generis Smith and Wesson in sinu braccarum ambulabat, mos ei erat iter qualecumque vel aeronavem ultima in minuta mutare, quam ob rem semel saltem, anno scilicet 1983, insidias ei tuendi paratas evitavit. Aliquotiens in aeronave iam sedens, gubernator, qui suspiciose ei visus esset, ut mutaretur societatem aeriam petivit...

Anno 1982 Beryti iaculator peritissimus militum Israhelianorum telescopio sclopeti sui eum per tempus quoddam observitabat, iussum tamen iaculandi a tribuno suo accipere non potuit.

Kalendis Octobris 1985 sedes eius pricipalis Tunisii pyrobolis ex aeronave missis omnino diruta est, septendecim hominibus mortuis - ipse tunc in autoraeda ducentis metris a loco explosionis vectus est.

Anno 1999, cum aeronavis eius ob defectum quemdam motri difficillime in deserto Libyaensi ad terram lapsa est, ne digitum quidem fregit.

Iaser Arafat, dux Palaestinensium, mortuus est hemorrhagia cerebri 11 Novembri ad Lutetiam Parisiorum.


Retro ad:

Novissima editio
Summum paginae