Liber Petri Paziński alludit suo titulo, qui est Viae aviariae, ad vias vicosque Varsovienses a Iudaeis magna ex parte olim habitatos, inter quos fuit vicus Aviarius, Anserinus, Anatinus et Pavoninus. De eis nominibus cogitanti venit mihi in manus a Quirina Handke factus Dictionarius nominum localium Varsaviae occurrentium. Ibi inveni multa alia vicorum vocabula ab avibus deducta, inter quos plurima Ursinoviae, ubi est vicus Accipitrinus, Ciconinus, Hirundineus, Alcedinis, Fringillae, Motacillae, Bombycillae (vulgo Jemiołuszki), Nycticoracis, Phalacrocoracum (vulgo Kormoranów), Ibidis, Meropis, Perdicis, Strigis, Struthiocameli, Tetraonis, Bubonum, Pelecanorum, Phasianorum, Aegithali (vulgo Raniuszka), Falconis Columbarii (vulgo Drzemlika), Falconis Rusticoli (vulgo Białozora), Leptoptili (vulgo Marabuta), Ramphasti (vulgo Tukana), Diomedearum (vulgo Albatrosów) et Gallinaginum (vulgo Bekasów). Alibi est via Aquilini Volatus (Polonice Orlego Lotu).

Quidam vici a Graecis et Romanis deis heroibusque nominantur. Invenies Varsoviae vicos Iovis, Iunonis, Neptuni, Veneris, Dianae et Victoriae (sed Graeca horum omnium numinum nomina usurpantur), Apollinis, Bacchi, Martis, Promethei, Florae, Fortunae, Melpomenes atque etiam hominum: Achillis (fuit etiam vicus Hectoris, sed anno 1998 esse desiit), Ulixis, Penelopes, Antigones, Daedali, Icari, Orphei, Eurydices et Sibyllae.

Quirina Handke docet nos etiam, quo tempore unum quodque nomen inditum sit. Magnopere miror Idibus Mais anni 1951 aliquos vicos accepisse nomina Communistis valde odiosa: Iosephi Piłsudski, Legionum, Iosephi Haller et reverendi Ignatii Skorupka, eaque amisisse demum post Iosephi Stalin mortem. Num quis lectorum novit, quomodo id fieri potuerit?

Est lusus, ad quem unus tantum particeps sufficit: nominibus vicorum additur vocabulum “culus”. Si videris hominem elenchum vicorum legentem paeneque corruentem risu, noli dubitare eum hoc lusu mentem reficere. In tali enim elencho erit vicus Tepidus, Ovalis, Detectus, Fragrans, Voluptuosus, Pharaonis, Familiae Połaniecki…

Nicolaus Simonides